ადვოკატის თქმით, კაცი, რომელიც გლდანში იარაღის უკანონო შეძენა-შენახვა-ტარების ბრალდებით დააკავეს, შეიარაღებული არ იყო. უფლებადამცველის თქმით, დაკავებულს თან არ ჰქონია ხელყუმბარა

"პოლიცია მიდიოდა იმიტომ, რომ საჩივარი იყო შესული, ოღონდ ამასთან დაკავშირებით ვერაფერს გეტყვით, უფრო სწორად, არ გეტყვით. ამაზე გამოძიება მიმდინარეობს, ამის გამო მიდიოდა პოლიცია, რომ უნდა დაეკავებინათ. რაც შეეხება იმას, რომ გიორგი, რომელმაც პირადად მე დამირეკა და მთხოვა რომ მივსულიყავი, იმიტომ რომ პოლიციას არ მიიღებდა, თუ მე არ მივიდოდი და ფატალური შედეგით შეიძლება დასრულებულიყო მისი გუშინდელი საღამო. თვითმხილველები ოთახში არ იმყოფებოდნენ. პირადად შევედი პირველი იმ სახლში, სადაც ინფორმაცია გავრცელდა, თითქოს ხელყუმბარა ეჭირა ხელში გახსნილ მდგომარეობაში, მას არანაირი ხელყუმბარა, არანაირი იარაღი ხელში არ ეჭირა. წუხანდლამდე არანაირი ხელყუმბარა არ იყო ამოღებული და დღეს რა ამოიღეს, არ ვიცი", — აცხადებს ადვოკატი.

გუშინ კაცი, შინაგან საქმეთა სამინისტროს განცხადებით, თბილისში, გლდანში ხელყუმბარის აფეთქებით იმუქრებოდა. იგი ახლობლის სახლში იმყოფებოდა და ასაფეთქებელი მოწყობილობა თან ჰქონდა. სავარაუდო მიზეზად უწყება ოჯახურ კონფლიქტს ასახელებს. პირი უკვე დაკავებულია.

საქმეზე გამოძიება საქართველოს სისხლის სამართლის კოდექსის 236-ე და 151-ე მუხლებით მიმდინარეობს, რაც იარაღის უკანონო შეძენა-შენახვა-ტარებასა და მუქარას გულისხმობს. დანაშაული 7 წლამდე ვადით თავისუფლების აღკვეთას ითვალისწინებს.