რუსთავის მე-5 პენიტენციური დაწესებულების პატიმარი ნანა სანდერი, რომელიც 4 ოქტომბრის საქმეზეა მსჯავრდადებული, "რადიო თავისუფლებას" დაუკავშირდა და იქ არსებულ მდგომარეობაზე ისაუბრა.

"რადიო თავისუფლების" ცნობით, მსჯავრდადებული მიზანმიმართულ ზეწოლაში ადანაშაულებს პენიტენციური სამსახურის უფროსს, გიორგი პატარიძეს, დაწესებულების დირექტორს, ნესტან ვერულაშვილს და ციხის სხვა თანამშრომლებს. სანდერი აცხადებს, რომ არასათანადო მოპყრობის ფონზე პროტესტის ნიშნად "დაუმორჩილებლობაზე" გადასვლას გეგმავს.

"არ მინდა 27 წლისა ციხეში მოვკვდე, მაგრამ მაიძულებენ", — ამბობს პატიმარი ნანა სანდერი რადიო თავისუფლებასთან სატელეფონო ზარში.

პატიმრის თქმით, მას მნიშვნელოვნად ეზღუდება გასეირნებისა და ადვოკატთან კომუნიკაციის უფლება. გარდა ამისა, ის საუბრობს სატელეფონო ზარების შეზღუდვებზე, სამედიცინო დახმარების დაგვიანებასა და იმ მძიმე პირობებზე, რომლებიც მას და სხვა პატიმრებს ძილში უშლის ხელს. "რადიო თავისუფლების" ცნობით, პატიმარი დაწესებულებას "საკონცენტრაციო ბანაკს" ადარებს.

მსჯავრდადებულის მტკიცებით, ციხის პერსონალი მას სისტემატურად უწყობს პროვოკაციებს და ერთ-ერთი მათგანი გასულ კვირას ფიზიკურადაც შეეხო.. იგი სახალხო დამცველსაც მოუწოდებს, საჯაროდ განხილოს პენიტენციურ დაწესებულებებში არსებული რეალობა. მისი თქმით, დაწესებულებაში არსებულ ვითარებაზე უკვე არაერთი საჩივარი აქვს დაწერილი.

"რადიო თავისუფლების" ინფორმაციით, პენიტენციური უწყება ნანა სანდერის ბრალდებებს კატეგორიულად უარყოფს. მათი განცხადებით, დაწესებულებაში არანაირი ინციდენტი არ მომხდარა და თანამშრომლების მხრიდან პატიმართან ფიზიკური შეხების ფაქტს გამორიცხავენ.

შეგახსენებთ, ნანა სანდერს ბრალად ედება ჯგუფური ძალადობის დაორგანიზება და "საქართველოს კონსტიტუციური წყობილების ძალადობით შეცვლისაკენ ან სახელმწიფო ხელისუფლების დამხობისაკენ" მოწოდება.