პოლიტოლოგ გია ხუხაშვილის განცხადებით, პრემიერის გადადგომისთვის სიტუაცია უკვე მომზადებულია. მისი ვარაუდით, ამის ერთ-ერთი ნიშანი შეიძლება იყოს მარიამ ქვრივიშვილის ვიცეპრემიერად დაწინაურება. ხუხაშვილი არ გამორიცხავს, რომ ქვრივიშვილი გარდამავალ პერიოდში პრემიერის მოვალეობის შემსრულებელი გახდეს ან თავად დაიკავოს პრემიერის პოსტი.

"მისი გადადგომისთვის ყველაფერი შემზადებულია. ის, ფაქტობრივად, დიდი ხანია უკვე სტერილურია. აღმასრულებელ ხელისუფლებაში არცერთ მინისტრს არ აქვს განცდა, რომ მასთან არის ანგარიშვალდებული. წმინდა ტექნიკური მთავრობა გაკეთდა. ეს განსაკუთრებით კარგად გამოჩნდა მას შემდეგ, რაც მდინარაძეც უცნაური ფორმით ჩამოაშორეს. ფაქტობრივად, ბოლო ადამიანი, რომელიც შეიძლებოდა აღგვექვა, როგორც მისი გუნდის წევრი. სიტუაცია შემზადებულია. არ გამოვრიცხავ, რომ [მისი დღევანდელი ვრცელი გამოსვლა მთავრობის სხდომაზე] შეიძლება ამას ნიშნავდეს და მე ეს შემიძლია გავაძლიერო იმითაც, რომ მარიამ ქვრივიშვილი იქნა დაწინაურებული ვიცეპრემიერად. დღეს მოხდა ესეც. ესეც გარკვეული ნიშანია იმის, რომ პრემიერობის დაისი მოახლოებულია. დასაშვებია, რომ გარდამავალ პერიოდში მარიამ ქვრივიშვილი შეიძლება იყოს დანიშნული პრემიერის მოვალეობის შემსრულებლად, წყვეტა რომ არ იყოს, სანამ ახალი პრემიერი იქნება ხელდასხმული, თუმცა არ გამოვრიცხავ, რომ ეს თავად მარიამ ქვრივიშვილი იყოს. დღევანდელი სტანდარტით, რაც გულისხმობს ტექნიკურ მთავრობას, პოლიტიკა მთლიანად უნდა იყოს გატანილი აღმასრულებელი ხელისუფლებიდან, პოლიტიკა უნდა იყოს ჩაკლული საბოლოოდ. ამ სტანდარტით, მარიამ ქვრივიშვილი, როგორც შედარებით დავარცხნილი, პოლიტიკასთან მაინცდამაინც ახლოს არ გავლილი პრემიერი, ბიძინას დღევანდელი აღქმით, მსოფლმხედველობით არის კარგი კანდიდატი. თან ქალბატონია, არ გამოირჩევა განსაკუთრებული აქტიურობით და აგრესიაც მის მიმართ ნაკლებია, ეს ვერსია სიცოცხლისუნარიანია", — განაცხადა ხუხაშვილმა.