ოპოზიციონერი პოლიტიკოსი და საქართველოს ეროვნული ბანკის ყოფილი ხელმძღვანელი, რომან გოცირიძე უნგრეთში დაგეგმილ ქონების გადასახადის ცვლილებებს ეხმაურება და მას საქართველოს რეალობას ადარებს.

როგორც გოცირიძე სოციალურ ქსელში წერს, უნგრეთი მდიდრებისთვის ქონების გადასახადის გაზრდას გეგმავს: 3 მილიონ დოლარზე მეტი აქტივების მქონე პირები ქონების 1%-ს გადაიხდიან, ხოლო 308 მილიონ დოლარს ზემოთ — 1.5%-ს (აღნიშნული შეეხება ინდივიდუალურად პირს და არა ოჯახს ერთად).

პოლიტიკოსი უნგრეთის მოდელს საქართველოს არსებულ საგადასახადო სისტემას უპირისპირებს და აცხადებს, რომ ქვეყანაში გაცილებით მძიმე ტვირთი აწევს დაბალშემოსავლიან ფენას.

"რა ხდება ამ კუთხით საქართველოში? ამაზე მძიმე გადასახადი უკვე მოქმედებს ჩვენთან, ოღონდ დაბალშემოსავლიანებისთვის — უძრავი ქონების 0,8-1 პროცენტს იხდის ყველა, ვისი ოჯახის ჯამური შემოსავალიც 100 ათას ლარზე მეტია, ანუ დაახლოებით 38 ათასი დოლარი.

ეს იმას ნიშნავს, რომ თუ ოჯახში სამ წევრს აქვს შემოსავალი, საშუალოდ, 12 700 დოლარი წელიწადში, ანუ დაახლოებით 1060 დოლარი თვეში, ის იხდის იმდენს, რამდენსაც უნგრელი დოლარში მილიონერი მომავალში გადაიხდის.

თუ აქტივები (მათ შორის, უძრავი ქონება) 308 მილიონ დოლარს გადააჭარბებს, უნგრეთში გადასახადის განაკვეთი 1,5 პროცენტი იქნება. ჩვენთან კი დღეს ნებისმიერი სახის შპს-სთვის ქონების გადასახადი 1 პროცენტია.

კარგად გამოჩნდა, თუ რატომ დააწესა მხოლოდ მოჭრილი 100 ათასი ლარის ზღვარი ქართულმა ოცნებამ და არ მოახდინა შემოსავლების დიფერენცირება. მაგალითად, 100-იდან 500 ათას ლარამდე შემოსავლის მქონე პირი ერთი განაკვეთით დაიბეგრა, ხოლო უფრო მაღალი შემოსავლის მქონე — განსხვავებული განაკვეთით." — აღნიშნავს გოცირიძე.

რომან გოცირიძის შეფასებით, ხელისუფლების მხრიდან შემოსავლების პროგრესული დიფერენცირების (მაგალითად, 100-იდან 500 ათას ლარამდე და უფრო მაღალი შემოსავლების განსხვავებული განაკვეთებით დაბეგვრის) არარსებობა მიზანმიმართულია.

პოლიტიკოსი ასევე ეხმიანება ხელისუფლების დაპირებას "ესტონური მოდელის" შესახებ და მიიჩნევს, რომ შემოთავაზებული მიდგომა, სადაც ქონების ნაცვლად მხოლოდ მიწა იბეგრება, მდიდარი ფენის ინტერესებზეა მორგებული, რადგან ის თანაბრად ეხება როგორც მცირე ფართობის "ქოხს", ისე მილიონიანი ღირებულების ცათამბჯენს.

"ეს იმიტომ არ გააკეთეს, რომ საპარლამენტო მილიონერებიც ისე დაბეგრილიყვნენ, როგორც ჩვენი სტანდარტით საშუალოშემოსავლიანი ადამიანები.

პარლამენტში თქვეს, რომ ეს დროებითია და მთავრობა ახალ კანონპროექტზე მუშაობსო. თუ ეს ესტონური მოდელია, ის მთლიანად მდიდრების ინტერესებზეა მორგებული-ქონება კი არ იბეგრება, არამედ ის მიწა, რომელზეც იგი დგას.

თუ გაქვს ეზო და ქოხი, გადაიხდი იმდენს, რამდენსაც იმავე ფართობის მიწაზე მდგომი ცათამბჯენი გადაიხდიდა. რადგან ღარიბი ბევრს ვერ გადაიხდის, "ჰუმანური" მოსაზრებით გადასახადი მცირე იქნება, მაგრამ იგივე პრინციპი გავრცელდება ასჯერ და უფრო მეტი ღირებულების მქონე ქონებაზეც.

პარლამენტში ყველა კანონი ვიღაცის ინტერესებზეა მორგებული. მთავარი "ვიღაცა" ვინ არის, ეს კი ვიცით", — დაწერა რომან გოცირიძემ.

ცნობისთვის, საკანონმდებლო ცვლილება, რომელიც ქონების გადასახადის 40 000-ლარიანი ზღვრის 100 000 ლარამდე ზრდას ითვალისწინებს, პარლამენტმა 30 სექტემბერს მესამე მოსმენით დაამტკიცა.

კერძოდ, საგადასახადო კოდექსში შეტანილი ცვლილების თანახმად, ის ფიზიკური პირები, რომელთა წლიური შემოსავალი 100 000 ლარს არ აღემატება, ქონების გადასახადისგან თავისუფლდებიან. აქამდე ეს ზღვარი 40 000 ლარი იყო.