სასჯელაღსრულებისა და პრობაციის ყოფილი მინისტრი კახა კახიშვილი 2027 წლის ბიუჯეტის პროექტში საჯარო სექტორში ხელფასების 8.4%-იან ზრდასა და პენსიის 20-დან 60 ლარამდე მატებას ეხმაურება.

კახიშვილი წერს, რომ "საქართველოში სახელმწიფო პენსია ადამიანს თვის დაახლოებით 6 ან 7 დღის საბაზისო ხარჯებს უფარავს და ეს იმ გაანგარიშებით, რომელშიც ბინის ქირა საერთოდ არ შედის". ამის შემდეგ კი კითხვას სვამს: "დანარჩენი 23 დღე როგორ უნდა იცხოვროს პენსიონერმა?".

"საჯარო სექტორში დასაქმებულ ადამიანს ღირსეული ხელფასი უნდა ჰქონდეს. სახელმწიფო სამსახურში პროფესიონალის შრომა სათანადოდ უნდა ანაზღაურდეს. მაგრამ საკვები, გათბობა, ელექტროენერგია, წყალი, ტრანსპორტი, ტანსაცმელი, წამალი და ექიმი მხოლოდ საჯარო მოხელეს არ სჭირდება. იგივე საჭიროებები აქვს პენსიონერსაც. ადამიანის ელემენტარული საჭიროებები პენსიაზე გასვლის დღეს არ ქრება.

ამიტომ საკითხი მხოლოდ ის არ არის, 20 ლარი ცოტაა თუ ბევრი. მთავარი კითხვაა, რამდენი სჭირდება დღეს პენსიონერს მინიმალურად ცხოვრებისთვის და რამდენად პასუხობს ამას სახელმწიფო პენსია?

სწორედ ამ კითხვამ დამაწყებინა საკითხის უფრო ღრმად შესწავლა. Moorepay-ის Global State Pension Report-ის მიხედვით, საქართველოში სახელმწიფო პენსია კვლევაში დათვლილი საბაზისო ცხოვრების ხარჯების დაახლოებით 22 პროცენტს ფარავს. ცხოვრების ხარჯების შესადარებლად კვლევა Numbeo-ს მონაცემებს იყენებს და ბინის ქირას ამ გაანგარიშებაში არ ითვალისწინებს. სწორედ აქედან მოდის დაახლოებით 6 ან 7 დღე, რომლითაც ეს წერილი დავიწყე", — წერს კახა კახიშვილის სოციალურ ქსელში.

მისივე თქმით, ყველასთვის გარანტირებული საბაზისო პენსია უნდა არსებობდეს და გათვალისწინებული იყოს დამატებითი კომპონენტი, რომელიც ოფიციალურ შრომით ისტორიას გაითვალისწინებს.

რატომ იღებს საქართველოში ერთნაირ სახელმწიფო ასაკობრივ პენსიას ადამიანი, რომელმაც 40 წელი ოფიციალურად იმუშავა და გადასახადები იხადა, და ადამიანი, რომელსაც ოფიციალური შრომითი სტაჟი საერთოდ არ აქვს?

...ამ ყველაფრის ფონზე ბუნებრივად ჩნდება კითხვა, უნდა ითვალისწინებდეს თუ არა საქართველოც სახელმწიფო პენსიის ოდენობის განსაზღვრისას ადამიანის მრავალწლიან ოფიციალურ შრომით ისტორიას?

...საბოლოოდ ეს არ არის მხოლოდ 20 ლარის, 60 ლარის ან 8,4 პროცენტის საკითხი. ეს არის კითხვა, როგორ იცავს სახელმწიფო ადამიანს სიბერეში და როგორ ითვალისწინებს მის მრავალწლიან შრომას.

და ბოლოს, ერთი მარტივი რამ არ უნდა დაგვავიწყდეს. დღევანდელი საჯარო მოხელეც, მინისტრიც, დეპუტატიც, კერძო სექტორში დასაქმებული ადამიანიც და ნებისმიერი სხვა დასაქმებულიც ერთ დღეს პენსიონერი გახდება. ამიტომ, როდესაც დღეს ვმსჯელობთ, როგორ უნდა იცხოვროს პენსიონერმა, მხოლოდ სხვის პრობლემაზე არ ვსაუბრობთ. საკუთარ მომავალზეც ვსაუბრობთ", — წერს კახა კახიშვილი.

შეგახსენებთ, რომ 30 სექტემბერს პარლამენტის საფინანსო-საბიუჯეტო კომიტეტის თავმჯდომარემ, პაატა კვიჟინაძემ 2027 წლის ბიუჯეტზე საუბრისას განაცხადა, რომ 2027 წლიდან ხელფასები 8.4%-ით მოიმატებს საჯარო სექტორში; 70 წელს ზემოთ პირებს პენსია 60 ლარით გაეზრდებათ, 70 წელს ქვემოთ მყოფებს — 20 ლარით.