1500-2500 ლარის შემოსავლის მქონე ფიზიკურ პირებისთვის კრედიტის ლიმიტი ნახევრდება. ამის შესახებ bm.ge წერს.

კერძოდ, საქართველოს ეროვნული ბანკი 2027 წლიდან ფიზიკური პირებისთვის სესხის აღების პირობებს ამკაცრებს და ცვლილება შეეხება სესხის მომსახურების კოეფიციენტს, ანუ PTI-ს, რომელიც განსაზღვრავს, მსესხებლის ყოველთვიური შემოსავლის რა ნაწილის გამოყენება შეიძლება სესხის მომსახურებისთვის.

ეროვნული ბანკის ფინანსური სტაბილურობის კომიტეტის გადაწყვეტილებით, ამჟამად მოქმედი 1500-ლარიანი ზღვარი ეტაპობრივად გაიზრდება. კერძოდ, 2027 წლის 1 თებერვლიდან 25%-იანი PTI-ის მოთხოვნა 2000 ლარამდე შემოსავლის მქონე პირებზე გავრცელდება, ხოლო 2027 წლის 1 სექტემბრიდან ზღვარი 2500 ლარამდე გაიზრდება. ეროვნული ბანკის განმარტებით, ცვლილების მიზანი ჭარბვალიანობის რისკების შემცირება და ფინანსური სისტემის მდგრადობის შენარჩუნებაა.

როგორც bm.ge წერს, ცვლილება იმ მსესხებლებს შეეხება, რომელთა ყოველთვიური წმინდა შემოსავალი 1500-დან 2500 ლარამდეა. მათთვის დასაშვები სესხის ყოველთვიური მომსახურების მაქსიმალური მოცულობა 50%-დან 25%-მდე მცირდება. შესაბამისად, ერთი და იმავე შემოსავლის მქონე პირისთვის ბანკიდან ხელმისაწვდომი სესხის მოცულობა, ფაქტობრივად განახევრდება. ანუ ეროვნული ბანკი 1500 ლარიდან 2500 ლარამდე შემოსავლის მქონე პირებს ბანკებიდან ასაღები კრედიტის მაქსიმალურ ლიმიტს უნახევრებს.

"მაგალითად, დღეს 1501 ლარის წმინდა ყოველთვიური შემოსავლის მქონე პირს, ლარში სესხის შემთხვევაში, PTI-ის 50%-იანი ზღვრის პირობებში, სესხის ყოველთვიური მომსახურება მაქსიმუმ 750.50 ლარი შეიძლება ჰქონდეს. წლიურ ჭრილში ეს ნიშნავდა კრედიტის მომსახურებაზე 9000 ლარის მიმართვას.

2027 წლის 1 სექტემბრიდან იგივე შემოსავლის მქონე პირისთვის ზღვარი 25% გახდება. შესაბამისად, მაქსიმალური ყოველთვიური მომსახურება 375.25 ლარამდე შემცირდება. ანუ თუკი პირს აქამდე მოქმედი ნორმით შეეძლო საკუთარი ხელფასიდან წლიურად 9000 ლარის კრედიტის მომსახურებაზე მიმართვა, ახლა ეს თანხა წლიურად 4500 ლარამდე მცირდება", — წერს bm.ge.

ახალ რეგულაციასთან დაკავშირებით სებ-ის ფინანსური სტაბილურობის დეპარტამენტის უფროსმა დავით უტიაშვილმა განაცხადა, რომ ამ დრომდე არსებული მიდგომა 2018 წლიდან მოქმედებს.

"საშუალო ხელფასი უახლოვდება დაახლოებით 2500 ლარს და ვფიქრობთ დროა, არსებული ზღვარი 2000 ლარიდან 2500 ლარამდე ავწიოთ. ჩვენი მიზანია, დაბალშემოსავლიან მოსახლეობას არ დააწვეს იმაზე მეტი ვალის ტვირთი, რომლის მომსახურებაც მათთვის ფინანსური სტრესის გარეშე რთული იქნება", — აცხადებს დავით უტიაშვილი.

ეროვნული ბანკის შეფასებით, ეტაპობრივი ცვლილება ხელს შეუწყობს როგორც დაკრედიტების პროცესზე გავლენის შემცირებას, ისე მსესხებლებისთვის ვალის ტვირთის ოპტიმალურ დონეზე შენარჩუნებას.