აზერბაიჯანის რესპუბლიკის საგარეო საქმეთა სამინისტრო საქართველოს საპატრიარქოს მიერ ქურმუხის ტაძართან დაკავშირებით გაკეთებული განცხადებას გამოეხმაურა. ბაქოში აცხადებენ, რომ საპატრიარქოს პოზიცია ორ ქვეყანას შორის არსებულ სტრატეგიულ და მეგობრულ ურთიერთობებს ეწინააღმდეგება.

აზერბაიჯანული მხარის განცხადებით, მიუღებელია ქვეყნის ტერიტორიაზე არსებული გეოგრაფიული და ისტორიული ტოპონიმების სხვა სახელწოდებებით მოხსენიება. საგარეო უწყება ხაზს უსვამს, რომ ოფიციალური ბაქო მუდამ პატივს სცემს საქართველოს სუვერენიტეტსა და ტერიტორიულ მთლიანობას, და ანალოგიური მიდგომა ორმხრივი პარტნიორობის საფუძველია.

"საქართველოს საპატრიარქოს მიერ აზერბაიჯანის ტერიტორიაზე მდებარე ქურმუხის ტაძართან დაკავშირებით გაკეთებული ბოლო განცხადებები ეწინააღმდეგება აზერბაიჯანსა და საქართველოს შორის არსებულ მეგობრობის, პარტნიორობისა და კეთილმეზობლური ურთიერთობების სულს.

მიუღებელია აზერბაიჯანის ტერიტორიაზე მდებარე გეოგრაფიული და ისტორიული ტოპონიმების სხვა სახელწოდებებით მოხსენიება.

აზერბაიჯანს ყოველთვის პატივისცემით ჰქონდა აღიარებული საქართველოს ტერიტორიული მთლიანობა და სუვერენიტეტი. ამავდროულად, ქართული მხარის მიერ აზერბაიჯანის ტერიტორიული მთლიანობისა და სუვერენიტეტისადმი ანალოგიური პატივისცემის დემონსტრირება ორ ქვეყანას შორის ჩამოყალიბებული სტრატეგიული პარტნიორული ურთიერთობების მნიშვნელოვან საძირკველს წარმოადგენს.

სწორედ ამ კონტექსტში, საქართველოს საპატრიარქოს მიდგომა, რომელიც აზერბაიჯანის ტერიტორიულ მთლიანობასა და სუვერენიტეტთან დაკავშირებულ ტერიტორიულ პრეტენზიებს გულისხმობს, გაუგებარია.

მნიშვნელოვანია, რომ რელიგიურმა ინსტიტუტებმა თავი შეიკავონ ისეთი მიდგომებისგან, რომლებმაც შესაძლოა საფრთხე შეუქმნას აზერბაიჯანელ და ქართველ ხალხს შორის საუკუნეების განმავლობაში ჩამოყალიბებული მეგობრობისა და კეთილმეზობლობის ისტორიულ კავშირებს.

ამასთან დაკავშირებით, სომხური ეკლესიისთვის ნაცნობი მიდგომების გამეორება ან მისი გზით სიარული რეკომენდებული არ არის.

აზერბაიჯანის ტერიტორიაზე მდებარე ყველა ისტორიული, კულტურული და რელიგიური ძეგლი აზერბაიჯანელი ხალხისა და აზერბაიჯანული სახელმწიფოს ეროვნული მემკვიდრეობის განუყოფელ ნაწილს წარმოადგენს," — ნათქვამია უწყების განცხადებაში.

საგარეო საქმეთა სამინისტრო მოუწოდებს რელიგიურ ინსტიტუტებს, თავი შეიკავონ ისეთი ქმედებებისა და განცხადებებისგან, რომლებმაც შესაძლოა ძირი გამოუთხაროს ორ ხალხს შორის საუკუნოვან კეთილმეზობლურ კავშირებს. განცხადებაში ასევე აღნიშნულია, რომ აზერბაიჯანის ტერიტორიაზე არსებული ყველა ისტორიული, კულტურული და რელიგიური ძეგლი ქვეყნის ეროვნული მემკვიდრეობის განუყოფელი ნაწილია.

• საპატრიარქო: უნდა დადგინდეს, რა სამუშაოები მიმდინარეობს ქურმუხის ტაძრის ტერიტორიაზე და ვინ ახორციელებს

ცნობისთვის, საქართველოს საპატრიარქომ განაცხადა, რომ ისტორიულ ჰერეთში, ქურმუხის წმინდა გიორგის ტაძარში და მის მიმდებარე ტერიტორიაზე მიმდინარე სამუშაოები შემაშფოთებელია, რადგან მათი მიზანი და საფუძველი გაურკვეველია. განცხადების მიხედვით, საპატრიარქოს აზერბაიჯანის შესაბამისი უწყებებისგან ამ სამუშაოების შესახებ ინფორმაცია არ მიუღია და კითხვები აქვს — რა სამუშაოები ტარდება, რა კვლევებს ეფუძნება ისინი, ვინ ახორციელებს და როგორ არის უზრუნველყოფილი ქართული კულტურული მემკვიდრეობის ძეგლის დაცვა.