საქართველოს პრემიერმინისტრი ირაკლი კობახიძე გაეროს გენერალური ასამბლეის 81-ე სესიაზე სიტყვით გამოვიდა.

მან გაეროს ტრიბუნიდან აღნიშნა, რომ მიმდინარე გლობალური გამოწვევებისა და საერთაშორისო არასტაბილურობის ფონზე, ერთადერთი გზა მშვიდობის შესანარჩუნებლად საერთაშორისო თანამშრომლობის გაძლიერებაა. მისი თქმით, ხანგრძლივი მშვიდობა ძალის გამოყენებით ვერ მიიღწევა და ის მხოლოდ დიალოგსა და ურთიერთპატივისცემას უნდა ეფუძნებოდეს.

"ჩემთვის დიდი პატივია ამ ასამბლეის წინაშე სიტყვით გამოსვლა საქართველოს სახელით — ქვეყნისა, რომლის იდენტობაც საუკუნოვანი ისტორიით, გამძლეობით და ცვალებად სამყაროსთან ურთიერთქმედების გზით ყალიბდებოდა. ჩვენ დღეს აქ ვიკრიბებით იმ დროს, როცა საერთაშორისო ვითარება მნიშვნელოვან ცვლილებებს განიცდის. მსოფლიოს სხვადასხვა რეგიონში განვითარებული მოვლენები ამჟამინდელ მდგომარეობას გამოწვევის წინაშე აყენებს და საერთაშორისო წესრიგის მომავალთან დაკავშირებით კითხვის ნიშნებს აჩენს. ამ ვითარებაში მშვიდობის შენარჩუნება და საერთაშორისო თანამშრომლობის განმტკიცება კვლავაც უმთავრეს პრიორიტეტებად რჩება.

გლობალურ დონეზე მზარდი გამოწვევების ფონზე, კოორდინირებული რეაგირება საერთო დაბრკოლებებზე, კონფლიქტების პრევენცია და მდგრადი განვითარების 2030 წლის დღის წესრიგში დასახული მიზნების მიღწევა შესაძლებელი იქნება მხოლოდ საერთაშორისო თანამშრომლობის გაძლიერებით და ერთობლივ ქმედებაზე საერთო პასუხისმგებლობის აღებით. ხანგრძლივი მშვიდობის დამყარება ძალის გამოყენებით შეუძლებელია; ის დიალოგს, ურთიერთგაგებას და ურთიერთპატივისცემას უნდა ეფუძნებოდეს", — განაცხადა პრემიერმა.

სიტყვით გამოსვლისას პრემიერმინისტრმა "აფხაზ და ოს ძმებსა და დებს" მიმართა და აღნიშნა, რომ საუკუნოვან საერთო ისტორიას და სამშობლოს ხელოვნურად გავლებული გამყოფი ხაზები ვერ წაშლის. მისი თქმით, საქართველოს ეკონომიკური განვითარების სიკეთეებით ოკუპირებულ რეგიონებში მცხოვრებმა ადამიანებმაც უნდა ისარგებლონ, რადგან ისინი ჩვენი საერთო მომავლის განუყოფელი ნაწილი არიან.

"წლევანდელი სესიის ერთ-ერთი მთავარი თემაა ნდობის აღდგენა და სწორედ ამ ფონზე მსურს ჩვენს აფხაზ და ოს ძმებს და დებს მივმართო.

საუკუნეების მანძილზე ჩვენ ერთი სამშობლო გვქონდა და საერთო ისტორია გვაკავშირებდა.

დღეისთვის გავლებული გამყოფი ხაზები ვერც ამ ისტორიას ვერ წაშლის და ვერც ჩვენი შვილების მომავალს ვერ განსაზღვრავს.

გვჯერა, რომ მშვიდობით მიღებული სიკეთეები და საქართველოს ეკონომიკური განვითარება ხელოვნურად გავლებული გამყოფი ხაზებით არ უნდა დაბრკოლდეს.
ამ სიკეთეებით სარგებლობა უნდა შეძლონ ჩვენს ოკუპირებულ ისტორიულ რეგიონებში მცხოვრებმა ადამიანებმაც — ვინც ჩვენი საერთო მომავლის განუყოფელი ნაწილი იყო და ყოველთვის იქნება კიდეც", — თქვა პრემიერმა.

პრემიერმინისტრმა აღნიშნა, რომ ძლიერი ეკონომიკური ზრდა რეალურ სოციალურ შედეგებში აისახება და მაგალითად სიღარიბის სამმაგი შემცირება (21.3%-დან 7.1%-მდე) მოიყვანა. მისი თქმით, მიუხედავად ამ წარმატებისა, მთავრობის მთავარი მიზანი უახლოესი ხუთი წლის განმავლობაში რეგიონებსა და სოფლებში შესაძლებლობების გაზრდა, უთანასწორობის შემცირება და ეკონომიკური სარგებლის თითოეულ მოქალაქემდე მიტანა იქნება.

"ძლიერი ეკონომიკური მაჩვენებლები ხელშესახებ სოციალურ შედეგებში უნდა აისახოს — ერთ სულ მოსახლეზე წარმოების ზრდა, რეალური ხელფასების მატება, სიღარიბის შემცირება, უკეთესი სამუშაო ადგილები და უფრო მეტი ეკონომიკური მდგრადობა.
ჩვენ უკვე ვხედავთ, რომ ეს შედეგები კონკრეტული და გაზომვადი სახით არის ასახული მაჩვენებლებში, რაც საქართველოში მდგომარეობის გაუმჯობესებაზე მეტყველებს, მაგ. სიღარიბის მაჩვენებელი სამჯერ შემცირდა და 7.1 პროცენტს შეადგენს, 2020 წლის 21.3 პროცენტთან შედარებით.

თუმცა, ეს მიღწევა მხოლოდ ერთი ნაწილია იმ უფრო ფართო ტრანსფორმაციისა, რომლის განხორციელებისკენაც ვისწრაფვით.

შესაბამისად, მომდევნო ხუთი წლის განმავლობაში ჩვენი მთავარი საზრუნავი იქნება ქალაქსა და სოფელს შორის არსებული უთანასწორობის შემცირება, თითოეულ რეგიონში შესაძლებლობების ამაღლება, იმის უზრუნველყოფა, რომ ეკონომიკური ზრდის სარგებელი ფართოდ გადანაწილდეს და არავინ დაგვრჩეს ყურადღების მიღმა", — აღნიშნა კობახიძემ.

მან ასევე თქვა, რომ საქართველო მზად არის პარტნიორებთან ურთიერთობისთვის, რადგან ხანგრძლივი პარტნიორობა და ეფექტური მულტილატერალიზმი მხოლოდ დიალოგით მიიღწევა და არა ზეწოლითა და იძულებით.

"საქართველო კვლავ გამოხატავს მზადყოფნას, რომ ურთიერთობა განაგრძოს ყველა საერთაშორისო პარტნიორთან, რომლებიც მზად არიან ჩვენთან სამუშაოდ, ურთიერთპატივისცემის და სუვერენული თანასწორობის საფუძველზე.

გვჯერა, რომ ხანგრძლივი პარტნიორობა მხოლოდ დიალოგით მიიღწევა და ეს შედეგი არასოდეს არ დადგება ზეწოლის ან იძულების გზით.

პატივისცემის და თანამშრომლობის პრინციპებიც ასევე ფუნდამენტურ მნიშვნელობას იძენს ეფექტური მულტილატერალიზმისთვის", — თქვა პრემიერმა.

შეგახსენებთ, ირაკლი კობახიძე ნიუ-იორკში გაეროს გენერალური ასამბლეის 81-ე სესიას ესწრება, რომელიც 18-28 სექტემბერს გაეროს შტაბ-ბინაში ტარდება.