დანიის კულტურის ინსტიტუტმა გუშინ, 23 სექტემბერს, 26 სექტემბერს გორში დაგეგმილი "კამარა ფესტივალი" უსაფრთხოების მიზნებიდან გამომდინარე გააუქმა. ღონისძიება შემოქმედებით ვორქშოპებს, საჯარო საუბრებს და მუსიკას აერთიანებს და ის ალექსანდრე კორძაიას, იგივე Kordz-ს უნდა დაეხურა.

"უსაფრთხოების მიზნებიდან გამომდინარე, "კამარა ფესტივალი" დაგეგმილი სახით ვერ ჩატარდება და, შესაბამისად, ის გადაიდო. მადლობას გიხდით ღონისძიების მიმართ გამოჩენილი დიდი ინტერესისთვის," — ვკითხულობთ ინსტიტუტის განცხადებაში.

შალვა პაპუაშვილი და სამთავრობო ტელევიზიები Kordz-ის წინააღმდეგ:

გორში დაანონსებული ფესტივალის გაუქმებამდე სამი დღით ადრე პარლამენტის თავმჯდომარე შალვა პაპუაშვილ ევროკავშირსა და იმ დონორ ორგანიზაციებს აკრიტიკებდა, რომლებიც ღონისძიებაში იყვნენ ჩართული. მისი თქმით, მათ უნდა გადაეწყვიტათ, გაემიჯნებოდნენ თუ არა იმ ქცევას, რომელსაც ის რადიკალიზმად კი არა, "ექსტრემიზმად და ფაშიზმად" აფასებს.

"საქმე გვაქვს ამ აბსოლუტურად ამაზრზენ მდგომარეობასთან, რომელსაც უბრალოდ სჭირდება გადაწყვეტილება ახლა. ასე რომ, ევროკავშირმა უნდა გადაწყვიტოს: ან ის ხდება თანამონაწილე ქართველი ხალხის უმრავლესობის გინების და მონად წოდების და იქნება ამის თანამონაწილე, ან გაემიჯნება ამ ქცევას, რომელიც უკვე რადიკალიზმი არ არის, ეს არის ექსტრემიზმი და ეს არის ფაშიზმი. ასე რომ, ჩვენ ველოდით პასუხს და ქმედებებს ევროკავშირის თუ იმ დონორი ორგანიზაციებისგან, რომლებიც ჩართული არიან ამ ღონისძიებაში," — განაცხადა პაპუაშვილმა.

Kordz-ის რეაქცია ფესტივალის გაუქმებაზე:

23 სექტემბრის საღამოს მუსიკოსმა სოციალურ ქსელში დაწერა, რომ გორის ადგილობრივი მუნიციპალიტეტი ღონისძიების ორგანიზატორებს "გაბრაზებული ბრბოთი" დაემუქრა, თუ მის პერფორმანსს არ გააუქმებდნენ. მისივე თქმით, ასეთ სიტუაციაში ღონისძიების სპონსორების მხრიდან რეაგირებას არ არსებობა "ნორმალური არ არის" და "ორგანიზატორების მხრიდან მცირედი მხარდაჭერა კარგი იქნებოდა".

"გორის ადგილობრივი მუნიციპალიტეტი ღონისძიების ორგანიზატორებს "გაბრაზებული ბრბოთი" დაემუქრა, თუ ისინი ჩემს პერფორმანსს არ გააუქმებდნენ. ეს მოხდა მას შემდეგ, რაც ერთკვირიანი უადგილო თავდასხმები განხორციელდა როგორც სამთავრობო მედიის, ასევე პარლამენტის მხრიდან ჩემსა და ღონისძიების ორგანიზატორებზე.

ღონისძიების სპონსორები (ევროკავშირი და გოეთეს ინსტიტუტი და დანიის კულტურის ინსტიტუტი) ფიქრობენ, რომ ასეთ სიტუაციაში რეაგირების არარსებობა ნორმალურია. მე ვფიქრობ, რომ ეს ნორმალური არ არის.

მმართველი პარტიის მიერ ჩემი კონცერტების გაუქმება ახალი დაბალი დონეა, ორგანიზატორების მხრიდან მცირედი მხარდაჭერა კარგი იქნებოდა," — დაწერა მუსიკოსმა ალექსანდრე კორძაიამ.

საქართველოში ევროკავშირის წარმომადგენლობის გამოხმაურება:

"უსაფრთხოების მიზნებიდან გამომდინარე" ჩაშლილ ფესტივალს საქართველოში ევროკავშირის წარმომადგენლობაც გამოეხმაურა, სადაც ნათქვამია, რომ წუხან "კამარა" ფესტივალის გადადების გამო, რადგან ის "კრეატიული კომპასი საქართველოს" ფარგლებში ევროკავშირის მიერ იყო დაფინანსებული. განცხადებაში აღნიშნულია, რომ ევროკავშირს შემოქმედებითი გამოხატვის თავისუფლების მტკიცედ სჯერა.

"სინანულს გამოვთქვამთ იმის გამო, რომ "კრეატიული კომპასი საქართველოს” პროექტის ფარგლებში, მის მიერ დაფინანსებული ფესტივალი "კამარა“ ორგანიზატორებმა უსაფრთხოებასთან დაკავშირებული მოსაზრებების გამო გადადეს.

30 წელია, ევროკავშირი მხარს უჭერს კულტურულ სფეროს საქართველოში — ეხმარება ქვეყანას უნიკალური კულტურული მემკვიდრეობის შენარჩუნებაში, ხელს უწყობს შემოქმედებით ინდუსტრიებს, საქართველოს ხელოვანებსა და კულტურულ სფეროში მოღვაწე ორგანიზაციებს მათ ევროპელ კოლეგებთან აკავშირებს.

ევროკავშირს შემოქმედებითი გამოხატვის თავისუფლების მტკიცედ სჯერა," — წერს ევროკავშირის წარმომადგენლობა საქართველოში.

ეს მუსიკოსებზე პოლიტიკური აზრის გამო თავდასხმა პირველი შემთხვევა არ არის. საქართველოს მუსიკოსთა პროფესიული კავშირი ალექსანდრე კორძაიას სოლიდარობას უცხადებს და მაგალითად ქართველი მუსიკოსის, ერეკლე გეწაძის შემთხვევა მოჰყავს.

"ეს არ არის პირველი შემთხვევა. საკმარისია გავახსენოთ ერეკლე გეწაძის მაგალითი, რომელმაც "თბილისი ოფენ ეარზე" რუსულ დროშაზე "მოშარდვით" (ბუშტიდან წყლის დასხმით) საკუთარი პროტესტი გამოხატა, რის შემდეგაც მისი შემოქმედება პლატფორმებიდან გაქრა და თავადაც ჩამოშორდა სფეროს. ხელოვნურად "გაქრობისა" და ჩახშობის ეს პრაქტიკა დამღუპველია კულტურული გარემოსთვის.

ჩვენი პოზიცია უცვლელია:

გამოხატვის თავისუფლება უზენაესია: ხელოვანს აქვს სრული უფლება, ჰქონდეს მოქალაქეობრივი პოზიცია.

არა პოლიტიკურ დევნას: დაუშვებელია სახელისუფლებო რესურსისა და რიტორიკის გამოყენება მუსიკოსების შესავიწროებლად თუ კონცერტების ჩასაშლელად.
TUMIG სრულ სოლიდარობას უცხადებს Kordz-ს და ყველა იმ მუსიკოსს, ვინც საკუთარი პოზიციის გამო წნეხის ქვეშ ექცევა. ხელოვნება ვერ იარსებებს ცენზურისა და შიშის გარემოში," — ვკითხულობთ გაერთიანების განცხადებაში.

შეგახსენებთ, რომ Kordz-ს ეკუთვნის ცნობილი მუსიკა "ოლე ოლა", რომელიც მმართველი პარტიის მისამართით გინებას შეიცავს. ალექსანდრე კორძაია ღია პოლიტიკური შეხედულების გამო მრავალჯერ გახდა თავდასხმის ობიექტი. კერძოდ, 2025 წლის 9 ივლისს ალექსანდრე კორძაიას საკუთარ სახლთან უცხო პირები დახვდნენ და მასზე თავდასხმა ცადეს, მაგრამ მუსიკოსმა გაქცევა მოასწრო.