საპროცესო შეთანხმების ფარგლებში, თავდაცვის ყოფილი მინისტრის, ჯუანშერ ბურჭულაძის ცოლისძმამ, ვასილ მხეიძემ და ყოფილმა მოადგილემ, გიორგი ხაინდრავამ ციხე დატოვეს.

14 სექტემბერს ბურჭულაძეს, მხეიძეს და ხაინდრავას საპროცესო შეთანხმება გაუფორმდათ. შეთანხმების თანახმად, ბურჭულაძე საპატიმროს 2 წელში დატოვებს.

ვასილ მხეიძეს 4 წლითა და 2 თვით თავისუფლების აღკვეთა მიესაჯა, აქედან 1 წელი და 2 თვე სასჯელაღსრულების დაწესებულებაში უნდა მოეხადა, ხოლო 3 წელი პირობითად ჩაეთვლება. მხეიძეს 100 000 ლარის ოდენობით ჯარიმის გადახდაც დაეკისრა.

გიორგი ხაინდრავასაც 4 წლითა და 2 თვით თავისუფლების აღკვეთა მიესაჯა, საიდანაც 1 წელი და 2 თვეს სასჯელაღსრულების დაწესებულებაში უნდა მოეხადა, ხოლო 3 წელი ჩაეთვლებოდა პირობით. მასაც 100 000 ლარის ოდენობით ჯარიმის გადახდა დაეკისრა.

საპროცესო შეთანხმებას წინ უძღოდა ქრთამის აღების საქმეზე ბურჭულაძის მიერ ირაკლი ღარიბაშვილის წინააღმდეგ ჩვენების მიცემა. პროკურატურის განმარტებით, ბურჭულაძეს საპროცესო შეთანხმება "გამოძიებასთან თანამშრომლობის ხარისხის გათვალისწინებით“ გაუფორმდა.

რაც შეეხება საქმის დეტალებს, უწყების ცნობით, 2022 წლის ბოლოს თავდაცვის სამინისტროს გაუჩნდა ძვირადღირებული სამედიცინო აპარატურის საიდუმლო წესით შესყიდვის საჭიროება. ბურჭულაძემ, თავისი ნათესავის, ვასილ მხეიძის მეშვეობით, ბიზნესმენს შესთავაზა შესყიდვის ისეთი პირობები, რაც წინასწარ განსაზღვრული კომპანიის გამარჯვებას უზრუნველყოფდა, სანაცვლოდ კი სახელშეკრულებო ღირებულების 10%-ის ქრთამის სახით მოთხოვნა დააყენა. ბიზნესმენის თავდაპირველი ყოყმანის შემდეგ, ბურჭულაძემ საკითხზე შეთანხმდა მაშინდელ პრემიერმინისტრ ირაკლი ღარიბაშვილთან, რომელმაც თავად მოითხოვა თანხის ნაწილი და გარანტია მისცა ბიზნესმენს.