თბილისის მერი კახა კალაძე გორში, ქართველი მუსიკოსის ალექსანდრე კორძაიას (Kordz) კონცერტის გაუქმებას გამოეხმაურა. მისი თქმით, საქართველოში გამოხატვის თავისუფლება დაცულია და ადამიანებს საკუთარი მოსაზრების გამოხატვის შესაძლებლობა აქვთ, თუმცა, მისი შეფასებით, შეურაცხყოფა, ცილისწამება, მუქარა და ფიზიკური ანგარიშსწორება გამოხატვის თავისუფლება არ არის და "კატეგორიულად მიუღებელია".

"საქართველოში გამოხატვის თავისუფლება დაცულია. დღეს ნებისმიერ ადამიანს აქვს შესაძლებლობა, გამოთქვას თავისი მოსაზრება, მაგრამ, როგორც ამ უსამშობლო ადამიანების პატრონები გარედან გვეუბნებიან, რომ შეურაცხყოფით, ცილისწამებით, მუქარით და ფიზიკური გასწორებით ვიმოქმედოთ, ეს არ არის სიტყვისა და გამოხატვის თავისუფლება. ეს არის დანაშაული და ყველაფერს უნდა დავარქვათ თავისი სახელი. როდესაც სცენას იყენებ იმისთვის, რომ ვიღაცას შეურაცხყოფა მიაყენო, ეს კატეგორიულად მიუღებელია. გაქვს საშუალება, გამოთქვა მოსაზრება თუნდაც სცენიდან, მაგრამ ეს უნდა იყოს კორექტულობის, კანონისა და წესიერების ფარგლებში", — განაცხადა კახა კალაძემ.

შეგახსენებთ, რომ კონცერტი დანიის კულტურის ინსტიტუტმა, რომელიც „კამარა ფესტივალის“ ორგანიზატორი იყო, გააუქმა/გადადო. მიზეზად უსაფრთხოების მიზნები დაასახელა. ამას წინ უძღოდა Kordz-ისა და ფესტივალის წინააღმდეგ სახელისუფლებო კამპანია და, თავად მუსიკოსის თქმით, ადგილობრივი ხელისუფლებისა და „ოცნების“ წევრების მხრიდან მუქარა.