პაკისტანმა ღამით მეზობელი ავღანეთის ორ პროვინციაზე ავიაიერიშები მიიტანა. ინფორმაციას Deutsche Welle ავრცელებს.

ქაბულში მყოფმა თალიბანის მთავრობამ განაცხადა, რომ დაიღუპა სულ მცირე ცხრა მშვიდობიანი მოქალაქე (ყველა მათგანი ქალი და ბავშვია), ხოლო 11 დაშავდა.

თავის მხრივ, პაკისტანის ხელისუფლება აცხადებს, რომ იერიშების შედეგად 22 მებრძოლია ლიკვიდირებული. არცერთი მხარის მიერ დასახელებული მსხვერპლის ოდენობის დამოუკიდებლად გადამოწმება შესაძლებელი არ არის.

ეს ავიაიერიშები ორ მეზობელ ქვეყანას შორის მიმდინარე წლის დასაწყისში გამწვავებული საზღვრისპირა დაძაბულობის ნაწილია.

2021 წელს თალიბანის მიერ ხელისუფლების ხელში ჩაგდების შემდეგ არსებული მუდმივი დაძაბულობა გასულ წელს ღია კონფლიქტში გადაიზარდა.

მარტში მიღწეული ზავის განსამტკიცებლად ორმა ქვეყანამ აპრილში სამშვიდობო მოლაპარაკებები გამართა, თუმცა მას შემდეგ დაპირისპირებები არ შეწყვეტილა.

ისლამაბადი ქაბულში მყოფ თალიბანის მთავრობას ადანაშაულებს იმ მებრძოლთა შეფარებაში, რომლებიც პაკისტანში,თავდასხმებს ახორციელებენ. ბრალდებას ავღანეთი უარყოფს.

გასულ კვირას გაერომ განაცხადა, რომ მიმდინარე წელს საზღვრისპირა კონფლიქტის შედეგად ავღანეთში 1 100-ზე მეტი მშვიდობიანი მოქალაქე დაიღუპა ან დაშავდა.

პაკისტანი ამტკიცებს, რომ სამიზნედ მშვიდობიან მოსახლეობას არ ირჩევს.