საფრანგეთში სკოლებში არსებული პირობების წინააღმდეგ დაწყებული საპროტესტო აქციები მასშტაბურ ძალადობაში გადაიზარდა. ინფორმაციას Euronews ავრცელებს.

როგორც შინაგან საქმეთა მინისტრმა ლორან ნუნიესმა განაცხადა, ბოლო დღეების განმავლობაში სამართალდამცავებმა 600-ზე მეტი ადამიანი დააკავეს, ხოლო ათობით პოლიციელი და ჟანდარმი დაშავდა.

პროტესტი თავდაპირველად პარიზის რეგიონში (ილ-დე-ფრანსი) დაიწყო და მოგვიანებით ქვეყნის სხვა ქალაქებშიც გავრცელდა. 15-დან 18 წლამდე ასაკის მოსწავლეები განრიგს, კლასებში მოსწავლეთა დიდ რაოდენობას, მასწავლებლების დეფიციტსა და წლევანდელი სიცხეების დროს გადახურებულ საკლასო ოთახებს აპროტესტებენ.

შინაგან საქმეთა მინისტრის ცნობით, მხოლოდ ოთხშაბათს, სკოლების ბლოკირების პარალელურად, 625 ადამიანი დააკავეს, ხოლო დაშავებული სამართალდამცავების რიცხვმა 83-ს მიაღწია. პროტესტმა სულ 356 სკოლა მოიცვა.

განათლების მინისტრმა ედუარ ჟეფრემ აღნიშნა, რომ არეულობის დაწყებიდან დღემდე 119 მოსწავლე და სკოლის თანამშრომელი დაშავდა. ყველაზე მძიმე ვითარება ფიქსირდება პარიზში, ბორდოში, ლიონსა და ლილში, სადაც პოლიციას შეტაკებებისას ცრემლსადენი გაზის გამოყენება დასჭირდა. მინისტრმა ხაზგასმით აღნიშნა:

"აუცილებელია, რომ ჩვენმა მოსწავლეებმა შეძლონ გაკვეთილებზე დაბრუნება, განსაკუთრებით მათ, ვისაც ამის შესაძლებლობა ამჟამად არ ეძლევა", — აღნიშნა მინისტრმა.

მადრიდში ვიზიტით მყოფმა პრეზიდენტმა ემანუელ მაკრონმა მომხდარი მკაცრად გააკრიტიკა და მემარცხენე პოლიტიკოსები "ძალადობის ლეგიტიმაციაში" დაადანაშაულა.