სამთავრობო ტელეკომპანია "იმედის" 2025 წლის ფინანსური ანგარიშის თანახმად, გასულ წელს ტელეკომპანიამ ოპერირება 43.1 მილიონი ლარის ზარალით დაასრულა. წინა წელთან შედარებით კომპანიის ზარალი 24.7 მილიონი ლარით, ანუ დაახლოებით 36%-ით შემცირდა. ამასთან, ტელეკომპანიის დაგროვილმა ჯამურმა ზარალმა 497.2 მილიონ ლარს მიაღწია.

2025 წლის ფინანსური ანგარიშის შესახებ ცნობებს BMG ავრცელებს.

მათი ცნობით, "ტელეიმედის" შემოსავალმა 2025 წელს 46.6 მილიონი ლარი შეადგინა, საიდანაც ძირითადი ნაწილი, 46.1 მილიონი ლარი, რეკლამიდან მიღებული შემოსავალი იყო. რეკლამიდან მიღებული თანხა 2024 წელთან შედარებით 7.2 მილიონი ლარით გაიზარდა. მთლიანმა შემოსავალმა, სხვა შემოსავლის ჩათვლით, 47.7 მილიონი ლარი შეადგინა, რაც 2024 წლის 40.1 მილიონ ლართან შედარებით 19%-იანი მატებაა. ანგარიშგების თანახმად, შემოსავლების ზრდაზე ასევე იმოქმედა საკუთარი წარმოების სერიალის ჩვენების უფლების რეალიზაციამ, თუმცა კომპანია აღნიშნავს, რომ ასეთი ტიპის შემოსავლები, როგორც წესი, რეგულარული ხასიათის არ არის.

2025 წელს "ტელეიმედის" ძირითადი ხარჯები ასე ნაწილდებოდა:

841 დასაქმებულის პერსონალის ხარჯები — 40.5 მილიონი ლარი;
ფინანსური ხარჯები — 25.5 მილიონი ლარი;
სხვა ხარჯები — 24.7 მილიონი ლარი;
ცვეთა და ამორტიზაცია — 6.7 მილიონი ლარი;
სავაჭრო და სხვა მოთხოვნების გაუფასურების ხარჯი — 6.6 მილიონი ლარი.

პერსონალის ხარჯი 2024 წელთან შედარებით 648.6 ათასი ლარით შემცირდა, ხოლო სხვა ხარჯები 5.9 მილიონი ლარით გაიზარდა. ცვეთისა და ამორტიზაციის ხარჯი 3.1 მილიონი ლარით შემცირდა.

შედარებისთვის, "ტელეიმედის" ზარალმა 2024 წელს 67.8 მილიონი ლარი შეადგინა, 2023 წელს კი 67.8 მილიონი ლარი. ზარალის კლების მიუხედავად, არხის ფინანსური პარამეტრები კვლავ რთულ ვითარებაშია, რადგანაც ტელეიმედი ფაქტობრივად ყოველწლიურად ზარალს განიცდის და დაგროვილმა ზარალმა 2025 წლის ბოლოს 497.2 მილიონ ლარს მიაღწია. მნიშვნელოვანი ფინანსური ზარალის გათვალისწინებით არხის საოპერაციო ხარჯები ძირითადად დაკავშირებული მხარეებისგან მიღებული კრედიტებით ფინანსდება.

მენეჯმენტის განმარტებით, კომპანიის საქმიანობის გაგრძელება დამოკიდებულია დაფინანსებაზე, ფინანსური სახსრების ხელმისაწვდომობასა და მოზიდვაზე და შემოსავლების გენერირებაზე. ამასთან, აუდიტორმა ფუნქციონირებად საწარმოსთან დაკავშირებით „არსებითი განუსაზღვრელობა“ გამოყო.

ანგარიშგების მიხედვით, 2025 წლის ბოლოს კომპანიაში საშუალოდ 841 ადამიანი იყო დასაქმებული, მაშინ როცა 2024 წელს დასაქმებულთა საშუალო რაოდენობა 880 ადამიანს შეადგენდა.

შეგახსენებთ, რომ "ტელეიმედს" ბრიტანეთმა სანქციები 2026 წლის 24 თებერვალს, რუსეთის მიერ უკრაინაში სრულმასშტაბიანი შეჭრის შესახებ "განზრახ შეცდომაში შემყვანი ინფორმაციის გავრცელების" გამო დაუწესა.

სანქციების დაწესებამდე 18 დღით ადრე, 6 თებერვალს, კომპანიის მფლობელმა, ბიზნესმენმა ირაკლი რუხაძემ "იმედისა" და მისი მფლობელი კომპანიის წილების გასხვისების შესახებ განაცხადა. გარიგების შედეგად "ტელეიმედის" მფლობელი კომპანია "პრაიმ მედია გლობალმა" 1000 ლარად შეიძინა.