პაატა აბულაძე ბრიტანეთის მიერ მის დასანქცირებას ეხმაურება და ამბობს, რომ ამის გამო მადლობელია, რადგან მანამდე უკვირდა, რატომ არ ასანქცირებდნენ. ის ბრიტანეთისა და ევროპის მთავრობებსა და პარლამენტარებს ფეისბუქ-ლაივში უხამსად მოიხსენიებს და ამბობს, რომ სანქციას საჩუქრად მიიჩნევს.

აბულაძე ასევე მოუწოდებს აშშ-ს, მიბაძოს ბრიტანეთს და დაასანქციროს. მისი თქმით, მოსკოვში ჩასვლისას, ახლა უკვე "თავაწეული" იქნება.

"1-ლი ოქტომბერი მომილოცა ბრიტანეთმა და დამასანქცირა! ბრიტანეთის დედაც და მთელი ევროპის ზედ მიყოლებული თავისი მთავრობითა და თავისი პარლამენტარებით სულ ყველასი!

მაგრამ ერთი კარგი რამე მოხდა. კარგი ის მოხდა, რომ სულ გული მომდიოდა. ისეთ ხალხს ასანქცირებენ, რავი, ტეხავდა, რა მე რომ არ მასანქცირებდნენ, რაღაც "ნიუდობნად" ვგრძნობდი თავს.

გამიგია, რომ უკრაინელებს იქ სისხლის სამართლის საქმე აღუძრავთ, მაგრამ აი, სოდომიტებისგან ძალიან მიკვირდა, რომ მე არ მასანქცირებდნენ და მადლობელი ვარ მე ბრიტანელების, რომ დამასანქცირეს!

ჩემგან გადაეცით უღრმესი მადლობა. ამაზე კარგი "პადარკა" ცოლის, მეუღლის დაბადების დღეზე ვერ გამიკეთებთ. მოვუწოდებ ამერიკელებსაც, "ეპშტეინელებსაც", "ეპშტეინელების" ბუდეს, წყაროს, რომ მიბაძონ ჭკვიან ბრიტანელებს. ახლა რომ ჩავალ რუსეთში, მოსკოვში,იქ უკვე თავაწეული ვიქნები და უკვე რომ გამომაცხადებენ, უკვე საქმეა, გენაცვალე", — ამბობს ფეისბუქ-ლაივში პაატა აბულაძე.

მედიაში გავრცელებული ცნობით, ის თბილისის მერის, კახა კალაძის ნახევარდის მეუღლეა.

დღეს დიდმა ბრიტანეთმა "რუსეთის სანქციების რეჟიმის" ფარგლებში, სანქცია დაუწესა 31 ფიზიკურ პირს, იურიდიულ პირსა და გემს, იმ საქმიანობისთვის, რომელიც საფრთხეს უქმნის უკრაინის სუვერენიტეტს, ტერიტორიულ მთლიანობასა და დამოუკიდებლობას. ამის შესახებ ინფორმაციას საქართველოში ბრიტანეთის საელჩო ავრცელებს.

ბრიტანეთის საგარეო საქმეთა სამინისტროს მიერ გამოქვეყნებული დოკუმენტიდან ირკვევა, რომ სანქციები საქართველოს 4 მოქალაქესაც შეეხო:

1. ქართული რუსულენოვანი ტელეარხ "სეზონი TV"-ის დამფუძნებელს, ნიკოლოზ მჟავანაძეს;

2. პარტია სოლიდარობა მშვიდობისთვის საერთაშორისო მდივანსა და პოლიტიკური საბჭოს წევრს, მამუკა ფიფიას;

3. ქართველი პოლიტიკური და სამხედრო მიმომხილველს, პაატა აბულაძეს.

4. პარტია სოლიდარობა მშვიდობისთვის პოლიტიკური საბჭოს წევრს, გიორგი ირემაძეს.