"ბოლოს და ბოლოს აქეთ-იქით გაიხედეთ, თქვენ გარშემო რამდენი ადამიანი დარჩა ქოცების მხარდამჭერი?" — ასე გამოეხმაურა საქართველოს მესამე პრეზიდენტი, მიხეილ სააკაშვილი სოციალურ ქსელში IRI-ის კვლევას და დაწერა, რომ ხალხს სიმართლის თქმის ეშინია. მისივე განმარტებით, იმ 46%-დან, რომელმაც კითხვაზე პასუხის გაცემაზე უარი თქვა, ნაწილი ნაციონალური მოძრაობის მხარესაა.

"ტყვედ ჩავარდნის წინ, კიევში შევხვდი IPSOS საზოგადოებრივი კვლევის, უდიდესი ევროპული კომპანიის რეგიონალურ დირექტორს. მან მითხრა, რომ საქართველოში საზოგადოებრივი აზრის კვლევის ჩატარება ურთულესია, ვინაიდან ხალხს ზუსტად ისევე ეშინია, როგორც რუსეთის მიერ ოკუპირებულ ყირიმში და დონეცკში და რომ პირდაპირ კითხვის დასმა უაზრობაა და ირიბი კითხვებით უნდა დაადგინო ნამდვილი განწყობა.

ასეთი იყო სიმართლე მასობრივ რეპრესიებამდე. ხალხის ციხეში ჩაყრამდე და ქუჩებში ხალხის ტერორამდე და ახლა როგორ ეშინია ხალხს კვლევებში სიმართლის თქმის ხომ წარმოგიდგენიათ! და 46%-დან რომელმაც უარი თქვა პასუხის გაცემაზე, რამდენია იგივე ნაცმოძრაობის მხარეს? და ვინც თქვა ოცნებას ვაძლევ ხმასო, რამდენი ოჯახის წევრია აიპ-ის და სსიპ-ის თანამშრომელი ან რამდენს უბრალოდ ეშინია სიმართლის თქმა.

და ბოლოს და ბოლოს, აქეთ-იქით გაიხედეთ, თქვენ გარშემო რამდენი ადამიანი დარჩა ქოცების მხარდამჭერი? ხოდა შეწყვიტეთ მოთქმა და ქოთქოთი და იფიქრეთ იმაზე, მე რომ საქართველოში თავისუფლად დავდიოდე, რამდენ ხანში დავასრულებდი ამათ", — დაწერა სააკაშვილმა.

ცნობისთვის, IRI-ის კვლევის პარტიულ რეიტინგებში ქართულ ოცნებას 36% აქვს, ნაციონალურ მოძრაობას — 5%, 2-2% აქვთ: იაგო ხვიჩიას პარტია გირჩს, ლეიბორისტულ პარტიას, გიორგი გახარიას პარტიას საქართველოსთვის და პარტია ახალს, 1-1% აქვთ: ანა დოლიძის პარტიას ხალხისთვის და ზურაბ ჯაფარიძის გირჩი – მეტი თავისუფლება, სტრატეგია აღმაშენებელს და ხალხის პარტიას. რეიტინგებში მოცემული არ არის ლელო და ფედერალისტები.