ყვარლის მუნიციპალიტეტში ავარიაში მოყვა სამარშრუტო ტაქსი, რომელსაც სოფელ ჩანტლისყურედან ახალსოფლის 1-ელ საჯარო სკოლაში 15 მოსწავლე გადაჰყავდა. მომხდარის შესახებ ინფორმაციას "მთავარი ამბები კახეთიდან" ავრცელებს.

მათი ცნობით, დაშავებულთაგან ერთს ხელის მტევანი აქვს მოტეხილი, მეორეს კი ლავიწის ძვალი გაუტყდა. შემთხვევა ახალსოფლის შესასვლელში, გზაჯვარედინზე მოხდა. მიკროავტობუსს მსუბუქი ავტომობილი შეეჯახა.

სამი ბავშვი კლინიკაში 112-ის ბრიგადამ გადაიყვანა. დანარჩენი მოსწავლეები კი, რომლებსაც მსუბუქი დაზიანებები აღენიშნებოდათ, პრევენციის მიზნით, სამედიცინო დაწესებულებაში მშობლებმა და ადგილზე მყოფმა პირებმა მიიყვანეს.

როგორც News.On.ge- შსს-ში უთხრეს, ჯამში 16 ადამიანია კლინიკაში გადაყვანილი, 15 ბავშვი და ერთი მიკროავტობუსის მძღოლი. გამოძიება 276-ე მუხლით დაიწყო, რაც ტრანსპორტის მოძრაობის ანუ უსაფრთხოების წესის დარღვევას გულისხმობს, რამაც გამოიწვია ჯანმრთელობის დაზიანება.

დამატებითი დეტალების გარკვევის შემთხვევაში, ინფორმაცია განახლდება.