შონ "დიდი" ქომბსის გათავისუფლების თარიღმა კიდევ ერთხელ გადმოიწია. NBC News-ის ინფორმაციით, მომღერალი ნიუ-ჯერსის ციხეში საკმაოდ კომფორტულადაც გრძნობს თავს. წყაროების ცნობით, 56 წლის რეპერი თვეში ათასობით დოლარს ხარჯავს, რათა ფუფუნება არ მოიკლოს და ისეთი აკრძალული ნივთებიც შეიძინოს, როგორებიცაა ტელეფონი და ალკოჰოლური სასმელები.

2025 წლის ივლისში ნაფიცმა მსაჯულებმა რეპერი წარდგენილი მძიმე ბრალდებისგან(მათ შორის რეკეტი და სექს-ტრეფიკინგი) გაამართლეს, თუმცა სასამართლომ ის დამნაშავედ ცნო პროსტიტუციის მიზნით ადამიანების ტრანსპორტირების ორ ეპიზოდში. სწორედ ამ ბრალდებით რეპერს 50-თვიანი პატიმრობა გასული წლის ოქტომბერში მიესაჯა.

უახლესი ოფიციალური მონაცემებით, შონ "დიდი" ქომბსის პატიმრობის ვადა კიდევ ერთხელ შემცირდა. თავდაპირველი განაჩენით, რეპერი ციხიდან 2028 წლის ივნისში უნდა გამოსულიყო, შემდეგ კი თარიღი 2028 წლის თებერვლამდე შემცირდა. ბოლო ინფორმაციით, რეპერი ციხიდან 2028 წლის 21 იანვარს გათავისუფლდება.

ახლახან გავრცელებულ ვიდეოში ჩანს, თუ როგორ იყენებს შონ "დიდი" ქომბსი ციხეში ფარულად შეტანილ მობილურ ტელეფონს. NBC News-ის მიერ გასაჯაროებული ინფორმაციით ირკვევა, რომ რეპერმა ციხეში ძვირადღირებული სასმელების მარაგის შეტანაც მოახერხა, შაბათ-კვირას ალკოჰოლს სვამს და სხვა პატიმრებისგან ანტიდეპრესანტებს ყიდულობს. წყაროს ცნობით, რეპერს ჰყავს პატიმრები, რომლებიც მის მაგივრად ალაგებენ, სარეცხს რეცხავენ და მუსიკოსს ჩინურ მასაჟსაც კი უკეთებენ. მეტიც, შხაპის ან საპირფარეშოს გამოყენებამდე, იქაურობას საგანგებოდ უსუფთავებენ.