რუსეთის რეჟიმის კრიტიკოსის და ჭადრაკის ლეგენდის, გარი კასპაროვის თქმით, ის გააფრთხილესმ, რომ მისი სიცოცხლე საფრთხეშია.

კასპაროვი სოციალურ ქსელში წერს, რომ ეს ინფორმაცია გასაკვირი არ არის, თუმცა შოკისმომგვრელია. გავრცელებული ინფორმაციით, გაფრთხილება მიიღო მისმა კოლეგამ ივან ტიუტრინმაც.

"ლიეტუვურმა და ამერიკულმა უსაფრთხოების სამსახურებმა გვაცნობეს, რომ ჩვენი სიცოცხლე საფრთხეშია და პრევენციული ზომები უნდა მივიღოთ", — წერს ის.

63 წლის კასპაროვმა რუსეთი ათი წლის წინ დატოვა. ბოლო წლებში სამშობლოში ის ტერორისტადაა გამოცხადებული.

როგორც "ელ მუნდო" (El Mundo) წერს, რუსეთი ამ ზაფხულს რამდენიმე დევნილი აქტივისტის ლიკვიდაციას გეგმავდა. ცოტა ხნის წინ შეერთებულ შტატებში მკვლელობის განზრახვის ბრალდებით ხუთი რუსი გაასამართლეს. გამოცემის ცნობით, მათ შეერთებულ შტატებში კასპაროვისა და ოპოზიციონერი ილია პონომარევის, ხოლო ვილნიუსში კიდევ ერთი პირის მოკვლა ევალებოდათ.