პარლამენტის თავმდჯომარის შალვა პაპუაშვილის განცხადებით, დიდი ბრიტანეთის მიერ გუშინ დაწესებული სანქციები არალევანტურია. მისი თქმით, სანქციები, რომელიც საქართველოს 4 მოქალაქეს და საქართველოს ოკუპირებულ რეგიონებთან კავშირში მყოფ 3 პირს შეეხო, ბრიტანეთის პოლიტიკის ნაწილია რუსეთთან დაკავშირებით. მან სანქციების ამოქმედება გაფუჭებული საათის მუშაობას შეადარა.

"გაფუჭებული საათი დღეში ორჯერ სწორ დროს აჩვენებს… შეიძლება რაღაც გადაწყვეტილება ჩვენი გადმოსახედიდანაც იყოს სწორი, მაგრამ ის გაფუჭებული საათი, რომელიც დიდ ბრიტანეთს აქვს სანქციებთან დაკავშირებით, გაფუჭებულ საათად რჩება", — განაცხადა პაპუაშვილმა.

ცნობისთვის, UK-მა გუშინ ნიკოლოზ მჟავანაძე, მამუკა ფიფია, გიორგი ირემაძე და პაატა აბულაძე დაასანქცირა. გარდა ამისა, დიდი ბრიტანეთის მიერ სანქცირებულთა შორის არის სამი პირი, რომლებიც კავშირში არიან საქართველოს ოკუპირებულ რეგიონებთან — აფხაზეთსა და სამხრეთ ოსეთთან: მარატ კამბოლოვი, ალან გაგლოევი და სერგეი ტოლმაჩოვი.

შალვა პაპუაშვილის განცხადებით, ეს გადაწყვეტილება არც რაიმეს არგებს ჩვენს ტერიტორიული მთლიანობის აღდგენას და არც რაიმეს აკლებს.

"ეს არის დიდი ბრიტანეთის პოლიტიკის ნაწილი… ამის შემდეგ რას აკეთებს? დიდი ბრიტანეთი MI6-ის რაზმით ჩავა ცხინვალში და აიყვანს იმას, თუ რას იზამს?

ეს არის დიდი ბრიტანეთის პოლიტიკა რუსეთთან დაკავშირებით. აქ ჩვენ ვართ მხოლოდ შემთხვევით მოხვედრილი. ეს არის დიდი ბრიტანეთის პოლიტიკის ნაწილი რუსეთთან დაკავშირებით. აქ საქართველო იქნებოდა, სომხეთი თუ ლიეტუვა, მაგას გადამწყვეტი მნიშვნელობა არ აქვს. ეს არის ურთიერთობა ორ ქვეყანას შორის. როგორ უნდა უთხრა მადლობა ქვეყანას, რომელიც ჩვენთან კონსულტაციებსაც არ გადის ამ საკითხთან დაკავშირებით, ასე ვთქვათ. იქნებ ვინმე დასამატებელი გვყავს, იქნებ ვინმე არ არის დასამატებელი. ხომ უნდა გაიარონ ჩვენთან კონსულტაცია, თუ ჩვენი ინტერესებით მოქმედებენ. მე იმის თქმა მინდა, რომ ეს გახლავთ დიდ ბრიტანეთსა და რუსეთს შორის ანგარიშსწორების ნაწილი. აქ ჩვენი ინტერესი არავის არ აინტერესებს", ­ — განაცხადა პაპუაშვილმა.

"ეს [დასანქცირებული] ადამიანები არიან რუსეთში, თავის სახელმწიფოდ მაინც აღიქვამენ რუსეთს, იქ არიან", ­— დასძინა მან.

UK-მა ნიკოლოზ მჟავანაძე, მამუკა ფიფია, გიორგი ირემაძე და პაატა აბულაძე დაასანქცირა