ევროკომისიამ გაფართოებისთვის მოსამზადებელი დოკუმენტები მიიღო. გაფართოვების გეგმაში საქართველო არ ფიგურირებს. გაფართოების საკითხებში ევროკომისარ მარტა კოსის განცხადებით, ევროკომისიამ გაწევრიანების პროცესში ოთხი მოწინავე კანდიდატი გამოყო, ესენია — მონტენეგრო, ალბანეთი, მოლდოვა და უკრაინა. კოსის განცხადებით, ევროკომისია მათთვის ინდივიდუალური სამოქმედო გეგმის მომზადებას გეგმავს.

"როგორც იცით, საქართველო კანდიდატი ქვეყანა მხოლოდ ქაღალდზეა. ვწუხვარ ამის გამო. ვისურვებდი, რომ ქართველი ხალხის უდიდესი მხარდაჭერის ფონზე, საქართველოც დღეს იმავე დონეზე ყოფილიყო, რაზეც მოლდოვა და უკრაინა არიან. ის, თუ როგორ გავაგრძელებთ წინსვლას ამ ქვეყანასთან მიმართებით, უმთავრესად დამოკიდებულია იმაზე, თუ როგორი იქნება წევრი სახელმწიფოების პოზიცია. თუმცა, ბევრი რამ, რაც ახლა ქვეყანაში ხდება, წარმოდგენილი იქნება ოქტომბრის ბოლოს გაფართოების ანგარიშებში. შეგიძლიათ წარმოიდგინოთ, რა მიმართულებით წავა ეს ყველაფერი," — განაცხადა გაფართოების ევროკომისარმა მარტა კოსმა საქართველოს შესახებ "ტაბულას" კითხვის საპასუხოდ.

ევროკომისიის დოკუმენტში ნათქვამია, რომ საგზაო რუკები 2026 წლის გაფართოების პაკეტის ფარგლებში მომზადდება, თუ ოთხივე ქვეყანა რეფორმების ტემპს შეინარჩუნებს. დოკუმენტში ვკითხულობთ, რომ გაფართოვების პროცესში მონაწილეობა კვლავაც დამოკიდებული იქნება პოლიტიკურ მზადყოფნასა და სტრატეგიულ თანხვედრაზე.

"ევროპის მომავალი დამოკიდებულია გადაწყვეტილებებზე, რომლებსაც დღეს ვიღებთ. ევროკავშირის გაფართოება გეოპოლიტიკური იმპერატივია. დღეს საფუძველს ვამზადებთ იმის უზრუნველსაყოფად, რომ უფრო დიდი ევროკავშირი უფრო ძლიერიც იქნება: უფრო მყარი, უფრო ეფექტური, და მყარად დაფუძნებული იმ ღირებულებებსა და წესებზე, რომლებიც ჩვენ განგვსაზღვრავენ. მაშინ როდესაც გაფართოების ქვეყნები წინ მიიწევენ რეფორმების საკუთარ გზაზე, ევროკავშირი მზად უნდა იყოს მათ მისაღებად. ეს ნიშნავს ჩვენი ინსტიტუტების მომზადებას, ჩვენი პოლიტიკის ახალი რეალობისთვის მომზადებას და იმის უზრუნველყოფას, რომ ჩვენი ბიუჯეტი ასახავს ჩვენს საერთო ამბიციებს," — განაცხადა კოსმა.

შეგახსენებთ, პარლამენტის თავმჯდომარე შალვა პაპუაშვილი ევროკომისარ მარტა კოსის მოლდოვასთან დაკავშირებულ განცხადებას გამოეხმაურა იმის შესახებ, რომ მოლდოვა შთამბეჭდავი ტემპით მიიწევს წინ ევროკავშირში გაწევრიანების გზაზე.

პაპუაშვილის განცხადებით, მოლდოვის პროგრესი მხოლოდ ბრიუსელის მხარდაჭერით შემოიფარგლება. პარლამენტის თავმჯდომარის მტკიცებით, საქართველოს მოლდოვასთან შედარებით მაღალი ეკონომიკური ზრდა იმიტომ აქვს, რომ "ბრიუსელს არ უჯერებს".