ცნობილი ინგლისურენოვანი თურქი მწერალი ელიფ შაფაქი მალე ახალ რომანს გამოსცემს. მთელი მარადისობა სულ ერთ წამში ("In One Brief Moment All Eternity") — ასე ჰქვია სქელტანიან ნაწარმოებს, რომელიც ლეგენდარული ფრანგი რომანისტის, გუსტავ ფლობერის, ცხოვრებას მხატვრულად მოგვითხრობს. გამომცემლის შეფასებით, ესაა "გასაოცარი ხიდი დასავლურ პროზასა და აღმოსავლურ პოეზიას შორის".

რომანში მოქმედება მე-19 საუკუნეში სხვადასხვა კონტინენტზე ვითარდება: საფრანგეთიდან სტამბოლამდე, ეგვიპტიდან ბეირუთამდე. ამბავს კი მდედრობითი სქესის 30 რეალური და გამოგონილი მთხრობელი ჰყავს: ფლობერის საქვეყნოდ ცნობილი პერსონაჟიდან, ემა ბოვარიდან და გამზრდელი გადიიდან, არც მეტი, არც ნაკლები, ზოოპარკში გამომწყვდეულ აქლემამდე.

"შეიძლება ლიტერატურამ მნიშვნელობა შეინარჩუნოს, როცა მსოფლიოს ცეცხლი უკიდია? ეს გახდა ჩემთვის საეტაპო შეკითხვა წიგნის დასაწერად", — ჰყვება შაფაქი, — "დავინტერესდი, თუ რას ნიშნავს შემოქმედებითობა ისტორიის რთულ პერიოდში და ამ კითხვაზე ძიებამ ყველასთვის საყვარელი რომანისტის ცხოვრებამდე მიმიყვანა. ეს გახლავთ გუსტავ ფლობერი, მადამ ბოვარის ავტორი, რომელმაც წიგნი ბლოკადის და შიმშილის პირობებში დაწერდა, როცა ომი, სამოქალაქო ომი მძვინვარებდა და ძმა ძმას კლავდა. და ვფიქრობ, იმის გახსენება, თუ როგორ აგრძელებდა იგი წერას და არ კარგავდა ლიტერატურის რწმენას, ჩვენს დროში ძალზე შთამაგონებელია".

შაფაქი ამატებს, რომ "ლიტერატურა არის იმის გახსენება, რაც ერთიანად წაშალეს და დაივიწყეს, ესაა მარადიულის პოვნა ეფემერულში, არაჩვეულებრივის — ჩვეულებრივში, ჯადოსნურის — არაფრით გამორჩეულში, პოეტურის — პროზაულში. ესაა გზა, რომლითაც გარე სამყაროს ვეცნობით და ვხედავთ, რამდენად განსხვავებული შეიძლებოდა ის ყოფილიყო".

მთელი მარადისობა სულ ერთ წამში პირველად გაერთიანებულ სამეფოში გამოიცემა 15 ოქტომბერს.

ასევე იხილეთ:

თუ წიგნების კითხვა და მათი განხილვა არასდროს გბეზრდება, შემოგვიერთდი ჯგუფში ერთი გვერდიც და...