რუმინეთის სანაპიროსთან, შავ ზღვაში სავაჭრო გემი ჩაიძირა. ხანძრის შესახებ შეტყობინების მიღების შემდეგ, ეკიპაჟის 11 წევრი ვერტმფრენით გადაარჩინეს, თუმცა ორი მეზღვაური დაიღუპა, — ამის შესახებ რუმინეთის შინაგან საქმეთა სამინისტრომ ორშაბათს, 5 ოქტომბერს განაცხადა. ინფორმაციას Deutsche Welle ავრცელებს.

ბუქარესტის განცხადებით, ინციდენტი რუმინეთის ექსკლუზიურ ეკონომიკურ ზონაში, ქალაქ სფინთუ-გეორგეს სამხრეთით, 30 საზღვაო მილის მოშორებით მოხდა. სააგენტო Reuters რუმინეთის საზღვაო ადმინისტრაციაზე დაყრდნობით იტყობინება, რომ გემს, რომელიც ჩაიძირა, Royad Mammadov ერქვა.

უკრაინის პრეზიდენტმა ვოლოდიმირ ზელენსკიმ ინციდენტში რუსეთი დაადანაშაულა. მისი თქმით, ორმა რუსულმა დრონმა თურქეთის კუთვნილ სამოქალაქო გემს დაარტყა.

"ბორტზე აზერბაიჯანისა და ინდოეთის მოქალაქეები იმყოფებოდნენ. ამ დროისთვის, სამწუხაროდ, ვიცით, რომ გემის კაპიტანი დაიღუპა", — წერდა სოციალურ ქსელში ზელენსკი.

მან ასევე აღნიშნა, რომ გემს სიმინდი გადაჰქონდა.

"უკრაინამ მრავალჯერ შესთავაზა კონკრეტული ნაბიჯები შავ ზღვაში დეესკალაციისა და უსაფრთხოების უზრუნველსაყოფად. არსებობდა წინადადებები მესამე ქვეყნების მხრიდანაც. თუმცა რუსეთი ნორმალური ნაოსნობის ნაცვლად, თანმიმდევრულად ირჩევს ტერორსა და სამოქალაქო გემების ჩაძირვას. გლობალური სურსათის უსაფრთხოების აღსადგენად ზეწოლაა საჭირო", — ხაზგასმით აღნიშნა უკრაინის პრეზიდენტმა.

გემების მეთვალყურეობის სერვის VesselFinder-ის მონაცემებით, წმინდა ქიტსისა და ნევისის დროშის ქვეშ მცურავი გემი Royad Mammadov უკრაინული პორტიდან, იზმაილიდან გავიდა და იტალიის ქალაქ რავენასკენ მიემართებოდა.