რუსთავის N6 პენიტენციური დაწესებულებაში 6 პატიმარმა მსჯავრდებული გიორგი დავითაძის სოლიდარობის ნიშნად შიმშილობა დაიწყო — ამის შესახებ დავითაძის ადვოკატმა, დარეჯან სულაშვილმა ჟურნალისტებთან საუბრისას განაცხადა.

"გიორგის მონათხრობის მიხედვით, მას შემდეგ, რაც "რუსთავი 2-ის" ეთერში გავიდა ეს კადრები – როგორ ისვრის გიორგი პოლიციელის მისამართით, ციხეში ატყდა ე.წ "შუმოკი" . გრგვინავდა ციხე… ყველამ მოითხოვა გასეირნება… გამოითქვა პროტესტი და სულაც არ გამოვრიცხავ, რომ სწორედ ამ პროტესტის ფარგლებში მოექცა ის მიზეზი, რასაც დღეს პენიტენციური. დაახლოებით 6 პატიმარი შიმშილობს, გიორგის უცხადებენ სოლიდარობას," — განაცხადა დარეჯან სულაშვილმა.

გიორგი დავითაძე ასევე მოინახულა პარტია გახარია საქართველოსთვის წევრმა, სოფო ხორგუანმა. ხორგუანიც აღნიშნულ ფაქტს ადასტურებს.

"რამდენიმე პატიმარმა შიმშილობა დაიწყო. მე, უბრალოდ, მინდა ამ პატიმრებს ვთხოვო, რომ შეწყვიტონ შიმშილობა. ბრძოლა საკუთარი უფლებებისთვის, რა თქმა უნდა, უნდა გააგრძელოთ სამართლებრივი გზებით, მაგრამ თქვენი ფიზიკური ჯანმრთელობა არის მნიშვნელოვანი," — განაცხადა სოფო ხორგუანმა.

სპეციალურმა პენიტენციურმა სამსახურმა NEWS.On.ge-ის უთხრა, რომ შიმშილობის ფაქტს არ ადასტურებენ.

შეგახსენებთ, რომ გიორგი დავითაძე, რომელიც რუსთავის №6 პენიტენციურ დაწესებულებაში იხდის სასჯელს, აცხადებს, რომ დეესკალაციის ოთახში მასზე რამდენიმე ბადრაგმა სექსუალურად იძალადა. პენიტენციური სამსახური ბრალდებას კატეგორიულად უარყოფს. უწყებამ 2 ოქტომბერს გაავრცელა ვიდეოკადრები, სადაც მათი თქმით, გიორგი დავითაძის დეესკალაციის ოთახში შეყვანაა ასახული. კადრებში ჩანს დავითაძის ძალით შემოწმება და ფიზიკური დაპირისპირება, თუმცა ჩანაწერს ხმა არ აქვს. საქმეზე გამოძიება მიმდინარეობს, ხოლო სახალხო დამცველის აპარატის განცხადებით, ამ ეტაპზე ფიზიკური ძალადობის დამადასტურებელი მტკიცებულება არ უნახავთ.

4 ოქტომბერს პენიტენციურმა სამსახურმა გაავრცელა ცნობა იმის შესახებ, რომ 21:12 საათზე რუსთავის №6 პენიტენციურ დაწესებულებაში მყოფმა გიორგი დავითაძემ ადმინისტრაციის თანამშრომლისა და საკნის ვიდეოკამერის წინ გაურკვეველი მცირე ზომის საგანი დემონსტრაციულად გადაყლაპა. უწყების განცხადებით, მას ჯანმრთელობის მდგომარეობის შემდგომი მონიტორინგისთვის კლინიკა "ვივამედში" გადაყვანა შესთავაზეს, თუმცა დავითაძემ უარი განაცხადა. შესაბამისად, მისი ჯანმრთელობის მდგომარეობის 24-საათიან მონიტორინგს პენიტენციური დაწესებულების მედპერსონალი ახორციელებს.