ჯეიმს ბონდის როლზე მსახიობის შერჩევა ერთი საკითხია, მაგრამ ფილმისთვის ბოროტმოქმედის შერჩევა — სულ სხვა საქმეა. გავრცელებული ინფორმაციით, პროდიუსერები მომდევნო ფილმისთვის დრაკონის სახლის ბრიტანელ მსახიობს განიხილავენ.

რეჟისორი, დენი ვილნევი, მზადაა, რომ ახალი ფილმის გადაღებები დაიწყოს. ბონდის 26-ე ფილმს Amazon უძღვება.

ცნობების თანახმად, ბოროტმოქმედის როლზე 29 წლის იუან მიჩელის კანდიდატურა განიხილება, რომელიც HBO-ს სამეფო კარის თამაშების სპინ-ოფში ასევე ბოროტმოქმედის — ეიმონდ ტარგარიენის როლს ასრულებს.

იუან მიჩელი

იუან მიჩელი

ფოტო: The Post

"იუანი იდეალური ვარიანტია, რადგან მას უკვე აქვს კარგი სამუშაო გამოცდილება, თუმცა არც ძალიან ცნობილი მსახიობია. Amazon ახალბედა, პერსპექტიულ მსახიობს ეძებს და არა უკვე აღიარებულ ვარსკვლავს. ამასთანავე სურთ, რომ მსახიობს გამორჩეული გარეგნობა ჰქონდეს" — განაცხადა წყარომ.

მან ასევე აღნიშნა, რომ პროდიუსერები უფრო ახალგაზრდული სამსახიობო შემადგენლობის შერჩევას გეგმავენ.

მიჩელის სხვა ნამუშევრებს შორის შედის BBC-ის სერიალები The Last Kingdom და World on Fire, ასევე ემერალდ ფენელის 2023 წლის ფილმი — Saltburn.

სერიალ Slow Horses-ის ვარსკვლავი, ჯეკ ლოუდენი, ახალ ფილმში ჯეიმს ბონდის როლზე მთავარ ფავორიტად სახელდება. ასევე განიხილებიან ჯეკ ბარტონი და კალუმ ტერნერიც.

ჯეკ ლოუდენი

ჯეკ ლოუდენი

ფოტო: GQ

გასულ თვეს ფილმის სცენარისტმა სტივენ ნაიტმა განაცხადა, რომ ჯეიმს ბონდის მსახიობი უკვე შერჩეულია.