ახალგაზრდა იურისტთა ასოციაციამ (საია) მოამზადა და გამოაქვეყნა ანგარიში — "საქართველოს მიერ ადამიანის უფლებათა ევროპული სასამართლოს გადაწყვეტილებების აღსრულების სისტემური ანალიზი ზოგად ღონისძიებებთან მიმართებით". წარმოდგენილ დოკუმენტში ძირითადი აქცენტი კეთდება იმ ნაბიჯებზე, რომლებიც სავალდებულოა სტრასბურგის სასამართლოს მიერ დაფიქსირებული დარღვევების ძირეული — საკანონმდებლო, ინსტიტუციური, პრაქტიკული და სისტემური — მიზეზების მოსპობისა და მსგავსი პრობლემების ხელახლა თავიდან აცილების მიზნით.

საიას განმარტებით, განსაკუთრებით განგაშის მომგვრელია ის გარემოება, რომ 2024 წლიდან მოყოლებული, რიგ მიმართულებებში არა მხოლოდ შეჩერდა პროგრესი, არამედ თვალსაჩინო უკუსვლა ფიქსირდება. ეს ტენდენცია ყველაზე მკაფიოდ გამოიკვეთა შემდეგ სფეროებში: მშვიდობიანი მანიფესტაციების მონაწილეთა წინააღმდეგ ძალის დემონსტრირება, არასათანადო მოპყრობის შემთხვევების გამოძიების პროცესი, ადმინისტრაციული და სისხლისსამართლებრივი მექანიზმების გამოყენების პრაქტიკა, დისკრიმინაციისა და გენდერული იდენტობის თემატიკა, აგრეთვე სასამართლო სისტემის დამოუკიდებლობის საკითხები.

დოკუმენტში ასევე მკვეთრად არის ხაზგასმული ეფექტიანი და დამოუკიდებელი ინსტიტუციური მექანიზმების შესუსტება ან მათი სათანადო წესით ფუნქციონირების ნაკლებობა. სიტუაციას კიდევ უფრო ამძიმებს სამოქალაქო სექტორის, მედიასაშუალებების, უფლებადამცველებისა და განსხვავებული, კრიტიკული ხედვის მქონე მოქალაქეების ირგვლივ შექმნილი მზარდი შემზღუდველი გარემო, რაც უარყოფითად აისახება რეფორმების აღსრულების პროცესზე.

საიას ანგარიში სრულად იხილეთ აქ.