შინაგან საქმეთა სამინისტრომ "კავკასიის უნივერსიტეტის" წვეულებაზე სტუდენტების სავარაუდო ინტოქსიკაციის ფაქტზე გამოძიება დაიწყო.

უწყებამ NEWS.On.ge-თან განაცხადა, რომ გამოძიება სსსკ-ის 124-ე მუხლით მიმდინარეობს, რაც გაუფრთხილებლობით ჯანმრთელობის ნაკლებად მძიმე ან მძიმე დაზიანებას გულისხმობს.

გავრცელებული ინფორმაციით, "კავკასიის უნივერსიტეტში" გამართულ Welcome Party-ზე მისულმა უცხო პირმა, სავარაუდოდ, "ალკოჰოლურ სასმელში გაურკვეველი ნივთიერება ჩაყარა". არსებული ინფორმაციით, კლინიკაში 5-მდე პაციენტია გადაყვანილი.

"კავკასიის უნივერსიტეტის" პრეზიდენტი კახა შენგელია მომხდარს უარყოფს. შენგელიამ "ტვ პირველთან" საუბრისას განაცხადა, რომ სასმლის მოწამვლას ადგილი არ ჰქონია და სტუდენტებმა ალკოჰოლი ზედოზირებით მიიღეს. მომხდარზე უნივერსიტეტმაც გაავრცელა განცხადება.

"გვინდა, მკაფიოდ განვაცხადოთ, რომ უნივერსიტეტის ტერიტორიაზე სტუდენტების სავარაუდო მოწამვლის ან სხვა სახის მასობრივი ინტოქსიკაციის შესახებ გავრცელებული ინფორმაცია არ შეესაბამება სიმართლეს.

ღონისძიების მიმდინარეობისას რამდენიმე სტუდენტს აღენიშნა ალკოჰოლური თრობის შედეგად გამოწვეული შეუძლოდ ყოფნა, რის გამოც მათ შესაბამისი სამედიცინო დახმარება აღმოუჩნდათ. სტუდენტების ჯანმრთელობას საფრთხე არ ემუქრება.

კავკასიის უნივერსიტეტი თანამშრომლობს შესაბამის უწყებებთან და საჭიროების შემთხვევაში მიაწვდის მათ ყველა შესაბამის ინფორმაციას.

მოვუწოდებთ მედიას და საზოგადოებას, არ გაავრცელონ დაუზუსტებელი ინფორმაცია და ვარაუდები დადასტურებულ ფაქტებად, რადგან მსგავსი ცნობები უსაფუძვლოდ აზიანებს როგორც სტუდენტების, ისე უნივერსიტეტის რეპუტაციას," — წერია უნივერსიტეტის მიერ გავრცელებულ განცხადებაში.