ესპანეთის პრემიერმინისტრმა პედრო სანჩესმა ვადამდელი საყოველთაო არჩევნები დანიშნა და კენჭისყრა, რომელიც თავდაპირველად 2027 წლისთვის იყო ჩანიშნული, 29 ნოემბრისთვის გადმოიტანა. ინფორმაციას Deutsche Welle ავრცელებს.

მიუხედავად იმისა, რომ ბოლო თვეების განმავლობაში სანჩესი დაჟინებით ამტკიცებდა, რომ მისი მთავრობა ოთხწლიან ვადას ბოლომდე გაიყვანდა, პრემიერმინისტრმა აღნიშნული გადაწყვეტილება მაინც მიიღო.

რიგგარეშე არჩევნების შესახებ განცხადება მას შემდეგ გავრცელდა, რაც პარასკევს პარლამენტში პრემიერმინისტრის მთავრობამ მარცხი განიცადა — კანონმდებლებმა უარყვეს ზომები, რომლებიც ესპანეთში არსებული საბინაო კრიზისის მოგვარებას ისახავდა მიზნად.

პრემიერმა არჩევნები წარმოაჩინა, როგორც არჩევანი ქვეყნის სამომავლო გეზის შესახებ. მისი თქმით, ამომრჩეველმა უნდა გადაწყვიტოს, შეუერთდება თუ არა ქვეყანა "მემარჯვენე ექსტრემისტულ ტალღას", თუ გააგრძელებს სვალს "ღიაობის, სოციალური სამართლიანობისა და გარემოსდაცვითი პასუხისმგებლობის" გზით. სანჩესის განცხადებით, მისი მიზანია "პარლამენტში ბევრად უფრო ფართო, პროგრესული უმცირესობის უზრუნველყოფა".

არჩევნების დანიშვნას წინ უძღოდა საცხოვრებელ ხარჯებთან დაკავშირებით გაძლიერებული საზოგადოებრივი წნეხი და მასშტაბური პროტესტები. შაბათს მადრიდსა და ესპანეთის სხვა ქალაქებში ათასობით ადამიანი გამოვიდა ქუჩებში. პროტესტი განსაკუთრებით გაძლიერდა მას შემდეგ, რაც გასულ თვეში მადრიდში ბინიდან გამოასახლეს 87 წლის მარინ კარმენ აბასკალი, რომელმაც ათწლეულები გაატარა ამ ბინაში (რის შემდეგაც ასობით დემონსტრანტმა ცენტრში კარვების ბანაკი მოაწყო). ბოლო პერიოდში საზოგადოებრივი აზრის გამოკითხვები ძირითადად აჩვენებს, რომ ოპოზიციური კონსერვატიული სახალხო პარტია სანჩესის სოციალისტურ მუშათა პარტიას უსწრებს.