ქუთაისის სააპელაციო სასამართლოში ე.წ. სასახლის ღობის საქმეზე დაკავებული 8 პირის სასამართლო პროცესზე ბრალდებულმა, ბათუმელმა მედროშე ზურაბ ჭავჭანიძემ განაცხადა, რომ საპროცესო შეთანხმების მოთხოვნით პროკურატურას ჯერ კიდევ ერთი თვის წინ მიმართა, თუმცა უწყებისგან პასუხი ამ დრომდე არ მიუღია. ინფორმაციას "ტვ პირველი" ავრცელებს.

ჭავჭანიძემ მოსამართლესა და პროკურატურას მიმართა, რომ მისთვის საპროცესო შეთანხმებასთან დაკავშირებით პასუხი გაეცათ და ის დარბაზიდან გაეთავისუფლებინათ.

თავის მხრივ, სახელმწიფო ბრალდებამ აღნიშნა, რომ მათთვის ზურაბ ჭავჭანიძის განცხადების შესახებ ცნობილი არ იყო და არც იმის თაობაზე ფლობდნენ ინფორმაციას, რომ ბრალდებულს საპროცესო გარიგების გაფორმება სურდა. ამავდროულად, პროკურორმა სხდომაზე განმარტა, რომ ბრალდების მხარის ზოგადი წინადადება საპროცესო შეთანხმებასთან დაკავშირებით ძალაში რჩება.