თბილისის მერიამ რუსთაველის გამზირის სარეაბილიტაციო სამუშაოების კონტრაქტორი კომპანია"სმარტ სოლუშენსი" გზის სამივე მონაკვეთში საკონტრაქტო პირობების დარღვევისთვის დააჯარიმა. მუნიციპალური ინსპექციის ცნობით, კომპანიამ არ შეასრულა ვალდებულება, რომელიც სამუშაოების 24-საათიან რეჟიმში წარმოებას ითვალისწინებდა.

ინსპექტირება 27 სექტემბერს ჩატარდა, რის საფუძველზეც კომპანიას საჯარიმო წერილები 29 სექტემბერს და 1-ელ ოქტომბერს გაეგზავნა. აღსანიშნავია, რომ მიმდინარე წლის 23 ივლისიდან დღემდე "სმარტ სოლუშენსი" 11-ჯერ არის დაჯარიმებული.

BMG-ის ცნობით, მუნიციპალური ინსპექციის მიერ გამოვლენილი დარღვევები და შესაბამისი სანქციები პროექტის სამივე უბანზე შემდეგნაირად ნაწილდება:

პირველი მონაკვეთი (ბესიკის ქუჩიდან თავისუფლების მოედნამდე): ხელშეკრულება (ღირებულებით 7 916 674.67 ლარი) 2026 წლის 10 ივლისს გაფორმდა. მიუხედავად უწყების დავალებისა, რომ სამუშაოები უწყვეტ რეჟიმში ეწარმოებინათ, 27 სექტემბერს, დილის 06:33 საათზე შემოწმებამ პროცესის შეჩერება დააფიქსირა. შედეგად, კომპანიას ხელშეკრულების ღირებულების 0.02%-იანი ჯარიმა — 1 583.34 ლარი დაეკისრა.

მეორე მონაკვეთი („მერანიდან“ ბესიკის ქუჩამდე): პროექტის ბიუჯეტი 5 778 105.16 ლარს შეადგენს. 27 სექტემბერს, დილის 08:00 საათზე ჩატარებული ინსპექტირებით დადგინდა, რომ 24-საათიანი მუშაობის რეჟიმი დაირღვა. კომპანიას საჯარიმო სანქციის სახით 1 155.63 ლარი დაეკისრა.

მესამე მონაკვეთი (ტ. ჭოველიძის ქუჩიდან "მერანამდე" / კოსტავას ქუჩა-რუსთაველის გამზირი): ხელშეკრულების ღირებულება 6 525 272.62 ლარია. მუნიციპალურმა ინსპექციამ 27 სექტემბერს, დილის 08:09 საათზე სამუშაოების შეჩერება აქაც გამოავლინა, რის გამოც კომპანიას 1 305.06 ლარის ოდენობის ჯარიმა დაეკისრა.