ოკუპირებული აფხაზეთის დე ფაქტო ხელისუფლება გალის რაიონში მცხოვრები ეთნიკური ქართველებისთვის გვარისა და ეროვნული კუთვნილების შეცვლის შესაძლებლობის შექმნაზე მუშაობს.

გამოცემა Abkhazeti.info-ს ცნობით, დე ფაქტო პარლამენტში "სამოქალაქო მდგომარეობის აქტების შესახებ" კანონპროექტია წარდგენილი, რომელიც გალის რაიონში მცხოვრებთ ქართული გვარების აფხაზური სტილით გადაკეთებას და "აფხაზებად" რეგისტრაციას მოსთხოვს, რის სანაცვლოდაც მათ "მოქალაქეობას" ჰპირდებიან.

კანონპროექტში აღნიშნულია, რომ ე.წ აფხაზური ეროვნებისა და გვარების აღდგენის უფლება მიეცემათ იმ უცხოელებს, რომლებიც ოკუპირებულ აფხაზეთში მუდმივად ცხოვრობენ და ეთნიკური აფხაზები არიან, ან წარმოადგენენ იმ პირთა პირდაპირ შთამომავლებს, რომლებმაც XIX და XX საუკუნეებში გატარებული ანტიაფხაზური ეროვნული პოლიტიკის შედეგად "აფხაზური ეროვნება დაკარგეს". რომ ცვლილება დაახლოებით 30 000 ადამიანს შეეხება, რომლებსაც ე.წ აფხაზეთის მოქალაქეობა 2011 წელს იმის გამო ჩამოერთვათ, რომ საქართველოს ორმაგი მოქალაქეობა ჰქონდათ.

აღსანიშნავია, რომ დოკუმენტი ამ ეტაპზე ჯერ კიდევ განხილვის პროცესშია. მსგავსი ხასიათის ინიციატივები გალის რაიონში ადრეც ფიქსირდებოდა.

აღნიშნულ ინფორმაციასთან დაკავშირებით, საქართველოს შერიგებისა და სამოქალაქო თანასწორობის საკითხებში ყოფილი სახელმწიფო მინისტრი პაატა ზაქარეიშვილი აცხადებს, რომ აფხაზეთში არასდროს ყოფილა "ქართველიზაციის" მიზანმიმართული პოლიტიკა და ის, რაზეც აფხაზები ახლა საუბრობენ, არანაირ კავშირში არ არის მე-19 საუკუნესთან ან სტალინ-ბერიას რეჟიმთან.

მისი განმარტებით, დღეს აფხაზების მთავარი პრობლემა დემოგრაფიაა და ისინი ამის მოგვარებას ისტორიაზე აპელირებით ცდილობენ. ზაქარეიშვილი ამბობს, რომ აფხაზები ოდენობით ცოტანი არიან და მათი მიზანია, ეს სურათი საკუთარი სასარგებლოდ რამენაირად შეცვალონ. მისივე თქმით, არსებობს გალის რაიონი, სადაც ბევრ ადამიანს საერთო გვარები აქვს, მათ შორის ისეთი გვარებიც, რომლებიც გავრცელებულია როგორც ქართველებში, ისე აფხაზებში, და ისინი ამის გამოყენებას ცდილობენ. ზაქარეიშვილი აღნიშნავს, რომ შეუძლებელია სომხური ან რუსული გვარის აფხაზურად გადაკეთება, მაგრამ მეგრული წარმოშობის ქართული გვარების გამოყენება მარტივია.

ზაქარეიშვილი ამბობს, რომ არგუმენტი იმის შესახებ, თითქოს გალის მოსახლეობისთვის "მოქალაქეობის" მინიჭებას საქართველოს ხელისუფლება აფხაზეთში საკუთარი გავლენის გასაძლიერებლად გამოიყენებს, სრული სისულელეა. მისი განმარტებით, ქართული ოცნება მხოლოდ საკუთარი ძალაუფლების განმტკიცებითაა დაინტერესებული და არა ოკპუირებული აფხაზეთის.