კიევის საერთაშორისო სოციოლოგიის ინსტიტუტის (KIIS) გამოკითხვის თანახმად, უკრაინელების 62% და ასევე კიეველთა უმრავლესობა მზად არის, ომს იმდენ ხანს გაუძლოს, რამდენიც საჭირო იქნება.

"უკრაინელების უმრავლესობა — 62% — აცხადებს, რომ მზად არის, ომს იმდენ ხანს გაუძლოს, რამდენიც საჭირო იქნება. კიდევ 4% შედარებით ხანგრძლივ პერიოდს, ერთ წელს ასახელებს.

უფრო მოკლე ვადით — რამდენიმე თვე ან ნახევარი წელი — ომის გაძლებისთვის მზადყოფნას 23% გამოთქვამს. დანარჩენმა 11%-მა საკუთარი პოზიცია ვერ განსაზღვრა", — წერია კვლევაში.

12-21 სექტემბერს ჩატარებული "ომნიბუსის" გამოკითხვის შედეგები წინა, ივლისის ბოლოსა და აგვისტოს დასაწყისში ჩატარებულ კვლევასთან შედარებით თითქმის არ შეცვლილა. მათ შორის, მაჩვენებელი არ შემცირებულა გამოკითხულ კიეველებს შორისაც. 72% აცხადებს, რომ მზად არის, ომს იმდენ ხანს გაუძლოს, რამდენიც საჭირო იქნება. ივლისის ბოლოსა და აგვისტოს დასაწყისში ეს მაჩვენებელი 69% იყო, თუმცა განსხვავება სტატისტიკური ცდომილების ფარგლებშია.

KIIS-ში აღნიშნეს, რომ გასათვალისწინებელია ისიც, რომ გამოკითხვა რუსეთის მხრიდან რეაქტიული დრონების გამოყენებით აქტიური ტერორის დაწყების შემდეგ ჩატარდა.

"ანუ ეს მონაცემები, სულ მცირე, 12-21 სექტემბრის მდგომარეობით, მოსახლეობის დემორალიზებაზე არ მიუთითებს. ამასთან, გამოკითხვა დნეპრზე მდებარე ხიდებზე დარტყმების დაწყებამდე დასრულდა", — აღნიშნულია KIIS-ის განცხადებაში.

ომისა და მშვიდობის შესახებ კითხვები გამოკითხვას არასამთავრობო ორგანიზაცია "ფორუმის" დაკვეთით დაემატა.

სოციოლოგებმა სატელეფონო ინტერვიუების მეთოდით 18 წლის და უფროსი ასაკის უკრაინის 1002 მოქალაქე გამოკითხეს, რომლებიც კვლევის პერიოდში უკრაინის მთავრობის მიერ კონტროლირებად ტერიტორიაზე ცხოვრობდნენ.

გამოკითხვა არ მოიცავდა ოკუპირებულ ტერიტორიებზე მცხოვრებ პირებსა და მოქალაქეებს, რომლებიც 2022 წლის 24 თებერვლის შემდეგ საზღვარგარეთ გავიდნენ. ამასთან, რესპონდენტებს შორის იყვნენ ოკუპირებული ტერიტორიებიდან იძულებით გადაადგილებული პირებიც.

95%-იანი სანდოობის პირობებში, ასეთი შერჩევის სტატისტიკური ცდომილება, დიზაინ-ეფექტის გათვალისწინებით, 50%-თან მიახლოებული მაჩვენებლებისთვის 1.8%-დან 4.1%-ს არ აღემატება.