ჯანდაცვის მინისტრის მიხეილ სარჯველაძის განცხადებით, დაახლოებით, 35 000-მდე ოჯახს შეუწყდა საარსებო შემწეობის მიღება, იმიტომ, რომ უმრავლეს შემთხვევაში მათი მდგომარეობა საბედნიეროდ, არის გაუმჯობესებული.

როგორც მთავრობის სხდომის დასრულების შემდეგ მინისტრმა განაცხადა, სახელმწიფომ მაქსიმალურად ყურადღებით უნდა აკონტროლოს, ვის ესაჭიროება და ვის შესაძლოა არ ესაჭიროება სოციალური მხარდაჭერა.

"ეს პროცესი გრძელდება, აქტიურ ფაზაშია. რაც შეეხება უშუალოდ რიცხვებს ამასთან დაკავშირებით, გადამოწმდა არა მხოლოდ 65 000 ოჯახი, არამედ გავცდით ამ რიცხვს და 80 000-ს ოჯახს მივაღწიეთ. როდესაც ამ თემაზე მუშაობა დავიწყეთ, რეგისტრირებული იყო 184 000 ოჯახი, ვინც შემწეობის მიღებაზე უფლებამოსილი პირი იყო. გარკვეული ქულების გადათამაშება ხდება. გადათამაშებაში იგულისხმება ის, რომ თუკი ამ დრომდე შეიძლება ვინმეს მაღალი ქულა ჰქონდეს, შემოწმების შედეგად შეიძლება დაბალი დაუფიქსირდეს ან პირიქით. სხვადასხვა ფაქტორებია. საკმაოდ რთული შეფასებაა თითოეული ოჯახის და რა თქმა უნდა, იქ არის მკაფიო კრიტერიუმები და არითმეტიკული სიზუსტით ხდება ამ ოჯახების მდგომარეობის შეფასება", — განაცხადა მიხეილ სარჯველაძემ.

მისივე თქმით, სოცდაუცველთა ბაზის განახლების შედეგად რამდენიმე ათეული მილიონი ლარი დაიზოგება.

"ამ ეტაპზე, გვაქვს ამის გადაჭრით თქმის შესაძლებლობა. დაახლოებით, 30 000-ზე მეტი, 35 000-მდე არის რიცხვი ოჯახების, რომლებსაც შეუწყდათ საარსებო შემწეობის მიღება, იმიტომ, რომ უმრავლეს შემთხვევაში მათი მდგომარეობა საბედნიეროდ არის გაუმჯობესებული", — აცხადებს სარჯველაძე.

ცნობისთვის, მიმდინარე წლის 20 თებერვალს ჯანდაცვის უწყების ხელმძღვანელმა, მიხეილ სარჯველაძემ განაცხადა, რომ სამინისტროს საჯარო სამართლის იურიდიული პირის სოციალური მომსახურების სააგენტო სოციალურად დაუცველი ოჯახების ბაზის გადამოწმების აქტიურ ფაზას დაიწყებდა. სარჯველაძემ მაშინაც განმარტა, რომ აღნიშნული ბაზა "შესაბამისობაში ვერ მოდის" იმ "აღიარებულ ეკონომიკურ წინსვლასთან", რაც ქვეყანას ბოლო წლების განმავლობაში ჰქონდა.