აშშ-ის ხელისუფლება ამერიკის მოქალაქეებს რუსეთში მოგზაურობისგან თავის შეკავებისკენ კვლავ მოუწოდებს, მას შემდეგ, რაც ციმბირში ფილტვის ჭირის შესაძლო შემთხვევა გამოვლინდა. ამის შესახებ The Hill წერს

სახელმწიფო დეპარტამენტმა სამშაბათს სოციალურ ქსელ X-ზე დაწერა, რომ აშშ-ის საელჩოსთვის ცნობილია ირკუტსკის ოლქში ფილტვის ჭირის შესაძლო შემთხვევის შესახებ გავრცელებული ინფორმაცია, რომლის შედეგადაც ერთი ადამიანი გარდაიცვალა. დეპარტამენტის ცნობით, რეგიონში კარანტინის ზომები ამოქმედდა და რამდენიმე საავადმყოფო დაიხურა.

"ჩვენ ვითარებას ყურადღებით ვაკვირდებით. აშშ-ის მთავრობას რუსეთში, განსაკუთრებით მოსკოვის ფარგლებს გარეთ, ამერიკის მოქალაქეებისთვის დახმარების გაწევის შეზღუდული შესაძლებლობა აქვს", — ნათქვამია განცხადებაში.

დეპარტამენტმა ასევე აღნიშნა, რომ რუსეთში მოგზაურობის შესახებ აშშ-ის მე-4 დონის რეკომენდაცია — "არ იმოგზაუროთ" (Do Not Travel) კვლავ ძალაშია და რუსეთში მყოფ ამერიკის მოქალაქეებს ქვეყნის დაუყოვნებლივ დატოვებისკენ მოუწოდებს.

ორშაბათს პრეზიდენტმა დონალდ ტრამპმა განაცხადა, რომ ჭირის შესაძლო შემთხვევა შეშფოთებას იწვევდა და აღნიშნა, რომ აშშ "ძალიან ყურადღებით აკვირდება" საკითხს.

"არ მინდა, რომ მათ ეს დაავადება ჰქონდეთ. ეს მძიმე დაავადებაა. ადრე მისი კონტროლი შეგვეძლო, მაგრამ რატომღაც ეს მიკრობები უფრო გაძლიერდა და გამრავლდნენ", — უთხრა ტრამპმა ჟურნალისტებს, სანამ თეთრ სახლს ნებრასკაში გამგზავრების მიზნით დატოვებდა.

NBC News-ის ინფორმაციით, ციმბირში დაახლოებით 200 ადამიანს სამედიცინო მეთვალყურეობა დაუწესდა მას შემდეგ, რაც ადგილობრივმა მედიამ გაავრცელა ინფორმაცია ლაბორატორიის 28 წლის თანამშრომლის გარდაცვალების შესახებ. გამოცემის ცნობით, შესაძლოა, ქალი ფილტვის ჭირით ყოფილიყო ინფიცირებული.

კვირას რუსეთის მომხმარებელთა უფლებებისა და ადამიანის კეთილდღეობის დაცვის სამსახურმა განაცხადა, რომ ქალი, რომელიც ჭირის წინააღმდეგ მებრძოლ ინსტიტუტში მუშაობდა, "უცნობი ეტიოლოგიის პნევმონიით" გარდაიცვალა. თუმცა, რუსეთის ხელისუფლებას გარდაცვალების კონკრეტული მიზეზი არ დაუსახელებია.

რუსულ და საერთაშორისო მედიაში აქტიურად ვრცელდება ინფორმაცია რუსეთში, ირკუტსკის ოლქში, გარდაცვლილი ახალგაზრდა ქალის შესახებ, რომელიც შავი ჭირის გამომწვევმა ინფექციამ იმსხვერპლა. საუბარია ბაქტერია Yersinia pestis-ზე, რომელიც მე-14 საუკუნის მომაკვდინებელი პანდემიის მიზეზი გახდა.

როგორც ცნობილია, 28 წლის დარია შიპილოვა საავადმყოფოში სექტემბრის მიწურულს გადაიყვანეს, ხოლო 2 ოქტომბერს იგი გარდაიცვალა. მის შემთხვევაში პნევმონიური ჭირი განვითარდა, რომელიც ინფექციის ერთ-ერთი ფორმაა. დანარჩენი ორია: ბუბონური და სეპტიკური, რომელთაგანაც ისტორიულ შავ ჭირთან უფრო მეტად პირველს აკავშირებენ.