პარლამენტის თავმჯდომარე შალვა პაპუაშვილი გაფართოების საკითხებში ევროკომისარ მარტა კოსის განცხადება გამოეხმაურა იმის შესახებ, რომ საქართველო მხოლოდ ქაღალდზეა კანდიდატი ქვეყანა.

შალვა პაპუაშვილის თქმით, საქართველოსთვის ევროკავშირის კანდიდატის სტატუსის მხოლოდ "ქაღალდზე" არსებობა სჯობს, ვიდრე ქვეყნის მხოლოდ "ქაღალდზე" სახელმწიფოდ დარჩენა. მისი განცხადებით, ბრიუსელის რეკომენდაციების გათვალისწინების შემთხვევაში საქართველო რუსეთთან ესკალაციაში ჩაერთვებოდა, ეკონომიკურად დაზიანდებოდა და შესაძლოა სამხედრო კონფლიქტშიც აღმოჩენილიყო, როგორც უკრაინა.

"მე მგონია, ჯობია მხოლოდ ქაღალდზე ვიყოთ კანდიდატი ქვეყანა, ვიდრე მხოლოდ ქაღალდზე ვიყოთ სახელმწიფო. ჩვენ რომ მოგვესმინა და დაგვეჯერებინა ბრიუსელისთვის, საქართველო დღეს ქაღალდზე იქნებოდა მხოლოდ სახელმწიფო. ბევრი მიზეზის გამო: პირველი, იმიტომ რომ ჩვენ რომ დაგვეჯერებინა ბრიუსელისთვის და წავსულიყავით ესკალაციაზე რუსეთთან, საქართველო იქნებოდა ეკონომიკურად ისევე დაზიანებული, როგორც მოლდოვა არის დაზიანებული; ჩვენ რომ დაგვეჯერებინა ბრიუსელისთვის და წავსულიყავით ესკალაციაზე რუსეთთან, საქართველო დიდი ალბათობით სამხედრო კონფლიქტში შევიდოდა და ახალ სამხედრო დაპირისპირებაში რუსეთთან და დღეს ისეთივე ომისგან დანგრეული ქვეყანა ვიქნებოდით, როგორც უკრაინა არის.

ასე რომ, მთავარი, რაც მთავარი ცოდვაა, ბრჭყალებში, რაც ჩვენ მიგვიძღვის ბრიუსელის წინაშე, არის ის, რომ მათ მავნე რჩევებს არ ვითვალისწინებთ და ქართველი ხალხი ამითი რჩება მოგებული. და პირიქით, კიდევ ერთხელ ვიმეორებ, რომ დაგვეჯერებინა ყველაფრისთვის, რასაც ისინი გვირჩევდნენ, დღეს საქართველო იქნებოდა სახელმწიფო მხოლოდ ფურცელზე. ასე რომ, მათ შეუძლიათ ეს ხატოვანი გამოთქმები ქალბატონ კოსს რამდენჯერაც უნდა იმდენჯერ გაიმეოროს, მაგრამ ჯობია იყო ფურცელზე, მხოლოდ ფურცელზე კანდიდატი ქვეყანა, ვიდრე მხოლოდ ფურცელზე სახელმწიფო", — განაცხადა შალვა პაპუაშვილმა.

შეგახსენებთ, რომ ევროკომისიამ გაფართოებისთვის მოსამზადებელი დოკუმენტები მიიღო. გაფართოების გეგმაში საქართველო არ ფიგურირებს. გაფართოების საკითხებში ევროკომისარ მარტა კოსის განცხადებით, ევროკომისიამ გაწევრიანების პროცესში ოთხი მოწინავე კანდიდატი გამოყო, ესენია — მონტენეგრო, ალბანეთი, მოლდოვა და უკრაინა.

"როგორც იცით, საქართველო კანდიდატი ქვეყანა მხოლოდ ქაღალდზეა. ვწუხვარ ამის გამო. ვისურვებდი, რომ ქართველი ხალხის უდიდესი მხარდაჭერის ფონზე, საქართველოც დღეს იმავე დონეზე ყოფილიყო, რაზეც მოლდოვა და უკრაინა არიან", — განაცხადა კოსმა.