განათლების სამინისტრო 866 231 ლარის დახარჯვას გეგმავს მასწავლებლის ეროვნული დღის აღსანიშნავი ღონისძიების ორგანიზებისთვის. შესაბამისი გამარტივებული შესყიდვა უკვე გამოცხადდა.

განათლების სამინისტროს ორგანიზებით, აღნიშნული ღონისძიება 27 ოქტომბერს ქუთაისის ტექნოლოგიურ ჰაბში გაიმართება, სადაც დაახლოებით 573 სტუმარს ელოდებიან.

“მასწავლებლის ეროვნული დღის ფარგლებში დაგეგმილია მასშტაბური ღონისძიების ჩატარება, რომლის ფარგლებშიც, საზოგადოებისა და განათლების სისტემის განვითარებაში შეტანილი განსაკუთრებული წვლილისთვის, ღვაწლმოსილ პედაგოგებს გადაეცემა მასწავლებლის ეროვნული პრემია – სპეციალურად შექმნილი სამკერდე ნიშანი და ფულადი ჯილდო 10 000 ლარის ოდენობით", — აცხადებს სამინისტრო.

აღსანიშნავია, რომ მასწავლებლის ეროვნული პრემია მთავრობამ 2023 წლიდან დააწესა, მანამდე The Global Teacher Prize-ის ფარგლებში არასამთავრობო სექტორის მიერ ტარდებოდა მასწავლებლის ეროვნული ჯილდო, რომელიც წელს მე-10-ჯერ შედგა. მთავრობა კი მსგავს ღონისძიებას პარალელურად ატარებს ცალკე უკვე მეოთხე წელია და გამარჯვებულ პედაგოგს 10 000 ლარის ჯილდოს გადასცემს. (მასწავლებლის ეროვნული პრემიის მოცულობა კი 15 000 ლარია).

"მოგეხსენებათ, ქვეყნისა და საზოგადოების განვითარების, ახალგაზრდების სახელმწიფოებრივად მოაზროვნე პატრიოტებად ჩამოყალიბების საქმეში მთავარი როლი და ფუნქცია დამსახურებულ, ღვაწლმოსილ პედაგოგებს აკისრიათ. შესაბამისად, განათლების, მეცნიერებისა და ახალგაზრდობის სამინისტრო აქტიურად აგრძელებს სხვადასხვა კუთხით მასწავლებლის პროფესიის პრესტიჟის ამაღლებაზე ზრუნვას და მათთვის როგორც სოციალური, ასევე სხვადასხვა მხარდამჭერი ღონისძიების შეთავაზებას. მასწავლებლის ეროვნული დღისა და პრემიის დაწესებაც სწორედ საზოგადოებაში პედაგოგების როლის ხაზგასმას და მათ დაფასებას ემსახურება”, - განმარტავს განათლების სამინისტროს გამარტივებული შესყიდვის დოკუმენტაციაში და დასძენს, რომ ბაზრის კვლევის ფარგლებში ღონისძიების ორგანიზებისთვის მოწვევა გაეგზავნა ამ მიმართულებით მომსახურე რვა კომპანიას. თანამშრომლობის სურვილი კი გამოხატეს კომპანიებმა: შპს "კოლექტიკამ", შპს "კონსიერჟ თბილისმა" და შპს "ლუმა დეველოპმენტმა". თუმცა, შპს "კოლექტიკას" მოწოდებული კონცეფცია და ბიუჯეტი (უმცირესი ფასი) სრულად აკმაყოფილებს სამინისტროს მიერ შემუშავებული ტექნიკური დავალების მოთხოვნებსა და ღონისძიების საჭიროებებს.