პრემიერი კობახიძე გამოეხმაურა საოპერო მომღერლისა და ოპოზიციონერი პოლიტიკოსის, პაატა ბურჭულაძის პოზიციასაც იმასთან დაკავშირებით, რომ ოცნებასთან საპროცესო შეთანხმება არა მონანიება, არამედ უკანონო პატიმრობისგან გათავისუფლების შესაძლებლობაა.

ირაკლი კობახიძის თქმით, პაატა ბურჭულაძემ ამ განცხადებით ბრალის აღიარება დააანონსა და ამ შემთხვევაში ხელისუფლება შესაბამის ნაბიჯს გადადგამს და ის საპატიმროს დატოვებს, მიუხედავად იმისა, რომ ხელისუფლების დამხობაში მიიღო მონაწილეობა.

"ბურჭულაძის ეს განცხადება არის აშკარა ანონსი. მასაც არ უნდა, ბუნებრივია, ციხეში ყოფნა და მან ასეთი ფორმით ერთგვარად დაგვიანონსა საკუთარი ბრალის აღიარება. ეს კარგი იქნება. მე მასაც მოვუწოდებ, აღიაროს საკუთარი დანაშაული. ასეთ შემთხვევაში, ჩვენი მხრიდან გადაიდგმება შესაბამისი ნაბიჯი, ის დატოვებს საპატიმროს. მიუხედავად იმისა, რომ ამ ადამიანებმა, მათ შორის ზოდელავამ, ბურჭულაძემ, სხვებმა ჩაიდინეს უმძიმესი დანაშაული, მათ ისახეს ხელისუფლების დამხობა — ასეთ პირობებშიც კი ჩვენ მზად ვართ გადავდგათ შესაბამისი ნაბიჯი. მიხარია, რომ დაანონსდა მისი მხრიდან აღიარება და, რა თქმა უნდა, თუ ეს ნაბიჯი გადაიდგმება, ჩვენი მხრიდანაც იქნება შესაბამისი რეაგირება", — განაცხადა კობახიძემ.

შეგახსენებთ, 7 ოქტომბერს საპატიმროდან გამოგზანილ წერილში ბურჭულაძე წერს:

"ციხის გარეთ მყოფნო "კეთილისმსურველებო", დაიმახსოვრეთ, პოლიტიკურ ტყვეებს არ სჭირდებათ გარედან ფარისევლური "ვაიშებრალება" და ცრემლის ღვრა! ისინი არიან გმირები, მაგრამ ეს არ ნიშნავს, რომ ისინი აუცილებლად მრავალი წლით უნდა დარჩნენ ტყვეობაში და თავი არ დააღწიონ ამ უკანონობას. მითუმეტეს, ყველამ ვიცით, რომ ოცნებასთან საპროცესო შეთანხმება არა მონანიება, არამედ უკანონო პატიმრობისგან გათავისუფლების შესაძლებლობაა".