2025 წელს საქართველოში დაქირავებით დასაქმებულთა საშუალო თვიური ნომინალური ხელფასი გასულ წელთან შედარებით 9.9%-ით (194.5 ლარით) გაიზარდა და 2 165.2 ლარი შეადგინა. მედიანური ხელფასი კი — 14.9%-ით გაიზარდა და 1 531 ლარი შეადგინა.

განახლებული მონაცემები საქსტატმა გამოაქვეყნა.

2025 წელს მედიანური ხელფასი საშუალო თვიურ ხელფასზე 29.3%-ით ნაკლები იყო.

ქვემოთ მოცემულ დიაგრამაზე წარმოდგენილია დაქირავებით დასაქმებულთა მედიანური და საშუალო თვიური ხელფასის მაჩვენებლები 2018-2025 წლებში.

ხელფასი

ხელფასი

ფოტო: საქსტატი

აღსანიშნავია, რომ 2025 წელს სახელმწიფო სექტორში ხელფასი 12.8%-ით, ხოლო არასახელმწიფო სექტორში 8.7%-ით გაიზარდა და შესაბამისად 1 895.4 და 2 301.0 ლარი შეადგინა. 2025 წელს დაქირავებით დასაქმებულთა საშუალო თვიური ნომინალური ხელფასი სახელმწიფო სექტორში 405.6 ლარით (17.6%) ნაკლები იყო არასახელმწიფო სექტორთან შედარებით.

რა სხვაობაა მედიანურ და საშუალო ხელფასს შორის?

საშუალო ხელფასის გამოსათვლელად საქსტატი კვარტალური კვლევებისათვის მონაცემებს 15 ათასამდე სხვადასხვა ზომის საწარმოდან აგროვებს. გამოკვლევა ითვალისწინებს საწარმოებიდან და ორგანიზაციებიდან აგრეგირებული მონაცემების შეგროვებას სახელფასო ფონდის და დასაქმებულთა რაოდენობის შესახებ. საქსტატი მიღებულ რიცხვს დაქირავებით დასაქმებულთა საშუალო რიცხოვნობაზე ყოფს.

მედიანური ხელფასი კი დათვლისას ყველაზე მაღალი ხელფასისა და დაბალი ხელფასი მქონე პირები გამოირიცხება და მხოლოდ შუალედური ხელფასის მქონე პირების საშუალო ხელფასი ითვლება. შესაბამისად, გამომდინარე იქიდან, რომ საშუალო მაჩვენებელზე მცირე რაოდენობის მაღალანაზღაურებადი თანამშრომლების ხელფასი მნიშვნელოვნად ზემოქმედებს, დიდია ალბათობა მედიანური ხელფასის გამოთვლისას მიღებული შედეგთან სხვაობა იყოს.