პრემიერ ირაკლი კობახიძის განცხადებით, ქართული ოცნების საპატიო თავმჯდომარის, ბიძინა ივანიშვილისთვის აშშ-ის სანქციების სიაში ყოფნა-არყოფნა საინტერესო არ არის და ამ საკითხს ამერიკელ წარმომადგენლებთან შეხვედრებზე არც განიხილავენ — მათი მთავარი მიზანი აშშ-სთან სტრატეგიული პარტნიორობის აღდგენაა.

"თავად ბიძინა ივანიშვილისთვის ეს არ არის საინტერესო. ჩვენთვის ყველასთვის, გუნდისთვის, მათ შორის ბატონი ბიძინა ივანიშვილისთვის, ერთადერთი რამ არის საინტერესო — როდესაც საქმე ეხება ამერიკის შეერთებულ შტატებს, ჩვენ გვინდა სტრატეგიული პარტნიორობის აღდგენა და ამაზე აქტიურად ვმუშაობთ.

ჩვენ შეხვედრებზე საერთოდ არ ვახსენებთ ხოლმე ამ საკითხს, იმიტომ რომ არც ბიძინა ივანიშვილისთვის არ არის საინტერესო და, შესაბამისად, არც ჩვენთვის არ არის ეს საკითხი საინტერესო. ერთადერთი, რაც გვაინტერესებს, ეს არის სტრატეგიული პარტნიორობის აღდგენა", — თქვა კობახიძემ.

მისი განცხადებით, ხელისუფლება აშშ-სთან სტრატეგიული პარტნიორობის აღდგენის იმედს ინარჩუნებს და მიიჩნევს, რომ ურთიერთობების გაჯანსაღების პროცესი ამერიკულ ადმინისტრაციაზეა დამოკიდებული. მისი თქმით, ეს საკითხი დონალდ ტრამპთან და მარკო რუბიოსთან ხანმოკლე საუბრების დროსაც დააყენა, თუმცა დეტალებზე არ ისაუბრა და აღნიშნა, რომ მხარეები მუშაობის გაგრძელებაზე შეთანხმდნენ.

"ჩვენ ვინარჩუნებთ ოპტიმიზმს. მშვიდად ვუყურებთ მოვლენებს, როგორც ვუყურებდით წინა ადმინისტრაციის პირობებში მათგან წამოსულ თავდასხმებს. ასევე დღესაც ვუყურებთ მშვიდად პროცესებს. მადლობა ღმერთს, ეს თავდასხმები აღარ არის, არის გაჯანსაღებული არსებითად ურთიერთობები. ვინარჩუნებთ ოპტიმიზმს იმასთან დაკავშირებით, რომ სტრატეგიული პარტნიორობა აღდგება. დანარჩენი არის მთლიანად ყველაფერი დამოკიდებული ამერიკულ ადმინისტრაციაზე.

...როგორც ბატონ ტრამპთან ხანმოკლე გასაუბრების დროს, ასევე ბატონ რუბიოსთან ხანმოკლე გასაუბრების დროს, მთავარი საკითხი, რაც ვახსენე, სწორედ ეს იყო — სტრატეგიული პარტნიორობის აღდგენა. ზოგადი პასუხი შემიძლია გითხრათ, დეტალებს ვერ მოვყვები გამომდინარე იქიდან, რომ არ იყო ღია კომუნიკაცია, საუბარი იყო იმაზე, რომ გაგრძელდეს მუშაობა.

სანქციები არაფერს ნიშნავს არც ბიძინა ივანიშვილისთვის და არც ჩვენთვის", — განაცხადა კობახიძემ.

შეგახსენებთ, რომ აშშ-ის სახაზინო დეპარტამენტის უცხოური აქტივების კონტროლის ოფისმა (OFAC) სანქციების სიებიდან 125 ფიზიკური და იურიდიული პირი ამოიღო, თუმცა ამ პირთა სიაში არ მოხვდა ქართული ოცნების საპატიო თავმჯდომარე ბიძინა ივანიშვილი, რომელიც OFAC-მა 2024 წლის 27 დეკემბერს დაასანქცირა და სპეციალურად დასახელებულ პირთა სიაში (SDN List) შეიყვანა.