ჩრდილოეთ იტალიაში იტალიის ფინანსურმა პოლიციამ 101 პირს ბრალი წარუდგინა და 29 დააკავა. იტალიური მედიის ცნობით, გამოძიება ეხება სავარაუდო სქემას, რომლის ფარგლებში ქართველი ქალები იტალიაში კონტრაბანდულად შეჰყავდათ და მომვლელებად ასაქმებდნენ.

სავარაუდო სქემას საქართველოს ორი მოქალაქე ხელმძღვანელობდა, რომლებიც საქართველოში სამუშაოს მაძიებელ თანამემამულეებს იბირებდნენ, ქალები იტალიაში უკანონოდ გადაჰყავდათ, შემდეგ კი იტალიის მოქალაქის მიერ უზრუნველყოფილ საცხოვრებლებში ათავსებდნენ.

სავარაუდო სქემის ფარგლებში ყალბ პირადობებსა და გაყალბებულ დოკუმენტებს იყენებდნენ, რათა საქართველოს მოქალაქეები ევროკავშირის მოქალაქეებად გაესაღებინათ და ამ გზით უცხოელი მუშაკების იტალიაში შესვლისა და დასაქმების წესებისთვის გვერდი აევლოთ.

ოპერაცია გუშინ, 7 ოქტომბერს, გამთენიისას დაიწყო და მასში იტალიის სხვადასხვა პროვინციაში იტალიის ფინანსური პოლიციის დაახლოებით 220 თანამშრომელი მონაწილეობდა. სულ 95 ადგილას მოხდა ჩხრეკა. ოპერაცია ბოლცანოსა და ტრენტოს გარდა, უდინეში, კროტონეში, რეჯო-ემილიაში, რეჯო-კალაბრიაში, გორიციაში, პორდენონეში, პიზასა და ბოლონიაში ჩატარდა.

გამოძიების მიხედვით, საქმე ეხება სამხრეთ ტიროლში მოქმედ კრიმინალურ ჯგუფს, რომელსაც იტალიის სხვა ტერიტორიებზეც ჰქონდა განშტოებები და რომელიც ხელს უწყობდა არალეგალურ იმიგრაციასა და უცხოელი მოქალაქეების ექსპლუატაციას.

გამოძიების ფარგლებში სულ 101 პირის მიმართ მოხდა ბრალის წარდგენა სხვადასხვა სავარაუდო დანაშაულზე, მათ შორის უკანონო შუამავლობასა და შრომით ექსპლუატაციაზე, ყალბი დოკუმენტების ფლობასა და დამზადებაზე, არალეგალური იმიგრაციის ხელშეწყობასა და იტალიაში უკანონო შესვლა-ყოფნაზე.

ჩხრეკებისას, რომელთა მიზანი ყალბი დოკუმენტების, კომპიუტერული მოწყობილობებისა და გამოძიებისთვის მნიშვნელოვანი სხვა მასალების აღმოჩენაც იყო, ფინანსური პოლიციის თანამშრომლებმა 29 პირი დანაშაულის ადგილზე დააკავეს.

საქმე ამ ეტაპზე წინასწარი გამოძიების ფაზაშია და უდანაშაულობის პრეზუმფციის პრინციპის შესაბამისად, გამოძიებაში მონაწილე პირების პასუხისმგებლობა საბოლოოდ მხოლოდ შესაძლო სასამართლო განაჩენით დადგინდება.