სებ-ის ყოფილი პრეზიდენტის, რომან გოცირიძის შეფასებით, ხელისუფლება და პრემიერმინისტრი ირაკლი კობახიძე ეკონომიკური ზრდის მაჩვენებელზე საზოგადოებას ატყუებენ. მისი თქმით, პრემიერი როცა აცხადებს, რომ საქართველოს ეკონომიკა ოთხჯერ გაიზარდა, ნომინალურ და რეალურ მშპ-ს ერთმანეთში ურევს: რეალურად კი 2012-2025 წლებში ქვეყნის ეკონომიკის მოცულობა 2-ჯერ და არა 4-ჯერ გაიზარდა.

"ხელისუფლებაში სიცრუით მოსული ქართული ოცნება სიცრუითვე აგრძელებს თავის პოლიტიკას. ერთ-ერთი უტიფარი სიცრუის ნაირსახეობაა ეკონომიკური ზრდის სიდიდით მანიპულირება, რომელსაც თოთხმეტი წელიწადია ეწევიან. მიუხედავად პროფესიონალების მხრიდან მრავალჯერადი მხილებისა, ტყუილებს მაინც არ ეშვებიან.

"საქართველოს ეკონომიკა 4-ჯერ გაიზარდა", — კვლავ, უკვე მეასედ მოიტყუა ოცნების პრემიერმინისტრმა. ეს არ არის ეკონომიკის რეალური ზრდა. სინამდვილეში, იგი მხოლოდ 2-ჯერ გაიზარდა.

ოცნების ხელისუფლება შეგნებულად ეწევა ნომინალური და რეალური მშპ-ის ერთმანეთში აღრევას და შესაბამისად, შეცდომაში შემყვანი დასკვნის ტირაჟირებას.
ციფრებს რომ შევხედოთ:

— 2012 წელს საქართველოს ნომინალური მშპ 27,9 მლრდ ლარი იყო.

— 2025 წელს — 104,6 მლრდ ლარი.

ანუ მიმდინარე ფასებში მშპ მართლაც დაახლოებით 3,75-ჯერ გაიზარდა. მაგრამ აქ არის მთავარი "პატარა" დეტალი: ნომინალურ მშპ-ში ფასების ზრდაც შედის, ანუ ხელისუფლება ფასების ზრდით ამაყობს.

თუ გვინდა გავიგოთ, რამდენად გაიზარდა რეალურად ეკონომიკა, ერთმანეთს უნდა შევადაროთ რეალური მშპ, ანუ მუდმივ ფასებში გამოხატული, ინფლაციისგან "გაწმენდილი" მაჩვენებელი. საქსტატის მონაცემებით, 2019 წლის მუდმივ ფასებში:

— 2012 წლის რეალური მშპ არის დაახლოებით 36,2 მლრდ ლარი.

— 2025 წლის რეალური მშპ — დაახლოებით 72,7 მლრდ ლარი.

მარტივი არითმეტიკით, დიდის პატარაზე გაყოფით მივიღებთ 2-ს. ანუ 2012–2025 წლებში საქართველოს რეალური ეკონომიკის მოცულობა გაორმაგდა — დაახლოებით 100%-ით გაიზარდა და არა ოთხჯერ, როგორც ამას ცრუ ხელისუფლების სანქცირებული ცრუ პროპაგანდის საშუალებები ავრცელებენ. ყველა სიცრუეს უნდა გაეცეს პასუხი. იტყვიან ასჯერ-ვუპასუხოთ ასჯერ", — წერს სოციალურ ქსელში სებ-ის ყოფილი პრეზიდენტი რომან გოცირიძე.