საქართველოს მე-5 პრეზიდენტი სალომე ზურაბიშვილი რუსეთში შავი ჭირის შესაძლო შემთხვევას ფეისბუქ-ლაივში გამოეხმაურა. ის აცხადებს, რომ რუსეთის მიერ გავრცელებულ ინფორმაციას ნდობა არ უნდა ჰქონდეს და საქართველოს ხელისუფლებამ საზოგადოებას უნდა აუხსნას, რამდენად რეალურ საფრთხეს წარმოადგენს ირკუტსკში შავი ჭირის შესაძლო შემთხვევა.

მისი თქმით, საქართველო რუსეთის საზღვართან მდებარეობს და რუსეთთან ინტენსიური მიმოსვლის გამო განსაკუთრებით დაუცველია, ამიტომ ხელისუფლებამ რუსეთს არსებული ვითარების შესახებ კითხვები უნდა დაუსვას და საზოგადოებას შესაძლო საფრთხეებსა და საპასუხო ზომებზე ინფორმაცია მიაწოდოს.

"რუსეთის არაფერი დაიჯერება და ჩვენ გვახსოვს ჩერნობილის შემთხვევა, როგორ დამალა რუსეთმა ძალიან დიდხანს, არანაირი გამჭვირვალეობა ამ საქმეზე არ ყოფილა. ასევე, ჩინეთმაც, გარკვეულწილად, დამალა კოვიდის დასაწყისი ეტაპი. ეს არის ავტორიტარული რეჟიმების ჩვევა და ასე იქცევიან იმიტომ, რომ საიდუმლოდ უნდა იყოს შენახული.

ჩვენ ვართ ერთ-ერთი ქვეყანა, რომელიც დგას რუსეთის საზღვარზე, ძალიან ბევრი მისვლა-მოსვლა, ხან ფრენებით და ხან ლარსის გზით, ასე რომ, ცხადია, რომ ჩვენ ვართ ერთ-ერთი დაუცველი ტერიტორია. ეს არ ნიშნავს იმას, რომ ახლა უნდა მიეცეს საზოგადოება პანიკას, მაგრამ ვისი პასუხისმგებლობაცაა ჯანდაცვა, პირველი მოვალეობაა, რომ აუხსნან საზოგადოებას რა ხდება, რამდენად წარმოადგენს საზოგადოებისთვის რეალურ საფრთხეს. თუკი ეს საფრთხე რამენაირად განხორციელდება, რა იქნება მაშინ ის ზომები, რაც იქნება მისაღები. ანუ უნდა ესაუბრონ საზოგადოებას.

ჩვენ ვიცით, რომ სხვადასხვა ქვეყნებმა მიიღეს გაფრთხილებები და ზომები. იცით, რომ კითხვებია დასმული რუსეთისთვის საერთაშორისო საზოგადოებისგან. მე მაინტერესებს ქართული ოცნების წარმომადგენლებმა, თუ დაუსვეს თავიანთ "მეგობარ" რუსეთს რამე კითხვები, რომ გაიგონ რა არის რეალური მდგომარეობა?," — ამბობს სალომე ზურაბიშვილი.

რუსულ და საერთაშორისო მედიაში აქტიურად ვრცელდება ინფორმაცია რუსეთში, ირკუტსკის ოლქში, გარდაცვლილი ახალგაზრდა ქალის შესახებ, რომელიც შავი ჭირის გამომწვევმა ინფექციამ იმსხვერპლა. საუბარია ბაქტერია Yersinia pestis-ზე, რომელიც მე-14 საუკუნის მომაკვდინებელი პანდემიის მიზეზი გახდა.

როგორც ცნობილია, 28 წლის დარია შიპილოვა საავადმყოფოში სექტემბრის მიწურულს გადაიყვანეს, ხოლო 2 ოქტომბერს იგი გარდაიცვალა. მის შემთხვევაში პნევმონიური ჭირი განვითარდა, რომელიც ინფექციის ერთ-ერთი ფორმაა. დანარჩენი ორია: ბუბონური და სეპტიკური, რომელთაგანაც ისტორიულ შავ ჭირთან უფრო მეტად პირველს აკავშირებენ.

რუსეთში შესაძლო შავი ჭირის არსებობის შესახებ გავრცელებული ინფორმაციის შემდეგ, უსაფრთხოების ზომები გააძლიერეს ყაზახეთმა, უზბეკეთმა და ყირგიზეთმა. აშშ-ს სახდეპმა კი მოქალაქეებს მოუწოდა, თავი შეიკავონ რუსეთში მოგზაურობისგან და ქვეყანა დაუყოვნებლივ დატოვონ.

მეტი რუსეთში შავი ჭირის შესაძლო გავრცელებაზე: