ევროპარლამენტში ქართული ოცნების მიერ ოპოზიციური პარტიების შესაძლო აკრძალვის თაობაზე დებატები გაიმართა. ევროპარლამენტარებმა აღნიშნული გადაწყვეტილება დაგმეს და პარტიის საპატიო თავმჯდომარის, ბიძინა ივანიშვილის დასანქცირება მოითხოვეს.

სხვა ევროპარლამენტარებისგან განსხვავებით, ქართული ოცნების კრიტიკის გამო გერმანული მემარჯვენე-პოპულისტური პარტიის, AfD-ის წევრმა, თომას ფროლიხმა ევროპარლამენტი "ორმაგ სტანდარტებში" დაადანაშაულა. ფროლიხმა ევროპარლამენტარებს ჰკითხა: "საერთოდ რა გაწუხებთ საქართველოში?".

"ორმაგი სტანდარტები აღარ შეიძლება! თქვენ დარდობთ ხვალ ოპოზიციური პარტიების შესაძლო აკრძალვაზე? მაშინ რატომ გსურთ გერმანიაში AfD-ის აკრძალვა, ხოლო ევროპულ დონეზე — ESN პარტიის? საერთოდ ამჩნევთ ამ ინტელექტუალურ წინააღმდეგობას? მას, ვინც საკუთარ ქვეყანაში ესხმის თავს დემოკრატიას, არ აქვს უფლება, აღელვდეს სხვაგან სავარაუდო დემოკრატიულ ხარვეზებზე! თქვენ სრულიად კარგავთ ნდობას. ნდობის ეს ნაკლებობა ჩანს თქვენს სელექციურ აღშფოთებაშიც — როდესაც უკრაინაში 20-ზე მეტი პარტია აიკრძალა, არანაირი პროტესტი არ ყოფილა, პირიქით, ზელენსკი კიდევ უფრო მეტი მილიარდით დააჯილდოვეთ. [...]

საერთოდ რა გაწუხებთ საქართველოში? ქვეყანა ვითარდება — 8%-იანი ეკონომიკური ზრდა, რაზეც ჩვენ მხოლოდ ოცნება შეგვიძლია. Chandler Good Governance Index-ში საქართველო უკეთეს შედეგს აჩვენებს, ვიდრე ევროკავშირის ზოგიერთი წევრი ქვეყანა, ხოლო World Justice Project-ის კანონის უზენაესობის რეიტინგში საქართველო პირველ ადგილზეა აღმოსავლეთ ევროპასა და ცენტრალურ აზიაში. რაზე ვსაუბრობთ აქ საერთოდ?

თქვენ საერთოდ არ გადარდებთ დემოკრატია და ჩართულობა. საქმე ისაა, რომ საქართველო უარყოფს woke სიგიჟესა და ლგბტ პროპაგანდას, რადგან სურს, შეინარჩუნოს თავისი ძლიერი ქრისტიანული ტრადიცია. საქმე ისაა, რომ საქართველო არ უერთდება რუსეთის წინააღმდეგ სანქციების რეჟიმს, რადგან არ სურს, გახდეს მეორე უკრაინა! ეს უნდა გავითვალისწინოთ," — განაცხადა მემარჯვენე-პოპულისტმა პოლიტიკოსმა.

AfD სწორედ ის პარტიაა, რომელსაც პარლამენტის თავმჯდომარე შალვა პაპუაშვილი მრავალჯერ მოიშველიებს არგუმენტად საქართველოში პარტიების აკრძალვაზე საუბრისას.

11 სექტემბერს პაპუაშვილა განაცხადა, რომ გერმანიაში AfD-ის აკრძალვაზე საუბრობენ, მიუხედავად იმისა, რომ პარტიას დანაშაული არ ჩაუდენია, ხოლო საქართველოში საუბარია იმ პარტიების აკრძალვაზე, რომლებიც ხელისუფლებაში ყოფნისას, მისი შეფასებით, არაერთი დანაშაული ჩაიდინეს — მათ შორის, წამების სისტემა და ბიზნესის რეკეტი შექმნეს და ტერიტორიები დაკარგეს.