შინაგან საქმეთა სამინისტრომ მომღერალ მიშო სულუხიას მიერ გავრცელებულ ინფორმაციასთან დაკავშირებით განმარტება გააკეთა. უწყებამ IPN-ს განუცხადა, რომ ლისის ტბის მიმდებარედ სამართალდამცველებმა წარსულში ნარკოდანაშაულისთვის ნასამართლევი და ამჟამად პირობითი მსჯავრის ქვეშ მყოფი მოქალაქე საეჭვოდ გადაადგილების გამო შეაჩერეს, თუმცა ის პოლიციის მოთხოვნას არ დაემორჩილა, მობილური ტელეფონი ძირს დააგდო და შემთხვევის ადგილიდან გაიქცა. უწყების ცნობით, ადგილზე ტელეფონი და მასში მოთავსებული საბანკო ბარათი დალუქეს, ფაქტზე კი ადმინისტრაციული წარმოება, ადმინისტრაციულ სამართალდარღვევათა კოდექსის 173-ე მუხლით, დაიწყო.

"წარსულში ნარკოდანაშაულისთვის ნასამართლევი და ამჟამად პირობითი მსჯავრის ქვეშ მყოფი მოქალაქე, რომელიც ლისის მიმდებარედ, ქვეითად, ტყის მასივში საეჭვოდ გადაადგილდებოდა, სამართალდამცველებმა გადამოწმების მიზნით შეაჩერეს.

აღნიშნული პირი არ დაემორჩილა პოლიციის კანონიერ მოთხოვნას, ძირს დააგდო კუთვნილი მობილური ტელეფონი და შემთხვევის ადგილიდან გაიქცა.

სამართალდამცველებმა ადგილზე დადგენილი წესით დალუქეს მობილური ტელეფონი, ასევე ტელეფონის ბუდეში მოთავსებული საბანკო ბარათი.

მომხდარ ფაქტთან დაკავშირებით დაწყებულია ადმინისტრაციული წარმოება საქართველოს ადმინისტრაციულ სამართალდარღვევათა კოდექსის 173-ე მუხლით, რაც სამართალდამცველის კანონიერი მოთხოვნისადმი დაუმორჩილებლობას გულისხმობს", — განუცხადა შსს-მ IPN-ს.

შეგახსენებთ, რომ მანამდე სულუხიამ სოციალურ ქსელში დაწერა, რომ ლისის ტბასთან სამოქალაქო ფორმაში ჩაცმულმა პირებმა ტაქსიდან გადმოსვეს, ფიზიკურად გაუსწორდნენ, ტელეფონი წაართვეს და ერთ საათზე მეტხანს გადაადგილება შეუზღუდეს.