ევროკავშირის ქვეყნების ელჩებმა რუსეთის სამხედრო-სამრეწველო კომპლექსთან დაკავშირებული 826 ორგანიზაციისა და 743 ფიზიკური პირის სანქციების სიაში შეყვანას მხარი დაუჭირეს. ეს ევროკავშირის სანქციების ერთჯერადად ყველაზე მასშტაბური გაფართოება იქნება, — წერს "რადიო თავისუფლებისა" და ტელეკომპანია "ნასტაიაშაია ვრემიას"-ს საგამოძიებო პროექტი "სისტემა", რომელმაც დოკუმენტი შეისწავლა.

დოკუმენტის თანახმად, სანქციების სიაში მოხვედრილი ორგანიზაციები რუსეთის მთავრობის მიერ შედგენილ სამხედრო-სამრეწველო კომპლექსის საწარმოთა ჩამონათვალში შედიან. ფიზიკური პირები კი ამ ორგანიზაციების ხელმძღვანელები და თანამშრომლები არიან.

ზოგიერთი საწარმოს მიმართ სანქციები პირველად არ დაწესდება — ევროკავშირი მათთვის უკვე მოქმედ შეზღუდვებს გააფართოებს. "სისტემის" წყაროს ინფორმაციით, ევროკავშირის ახალი სანქციების სია ოფიციალურად მომავალ კვირას, ევროკავშირის წევრი ქვეყნების საგარეო საქმეთა მინისტრების შეხვედრაზე გამოცხადდება.

სანქციები გემთმშენებელ ქარხნებს, რაკეტებისა და ტომრების მწარმოებლებს შეეხება
შეთანხმებულ სიაში დიდი სამრეწველო საწარმოებია, მათ შორის გემების სარემონტო ქარხანა "ზვეზდოჩკა" და "ადმირალთა გემთმშენებლობები", ასევე რაკეტებისა და უპილოტო საფრენი აპარატების მწარმოებლები.

შეზღუდვები "როსკოსმოსის" საწარმოებსაც შეეხება, მათ შორის გაერთიანებულ სარაკეტო-საეროკოსმოსო კორპორაციას. სიაში ასევე მოხვდა მსუბუქი მრეწველობის ის ორგანიზაციები, რომლებიც რუსეთის სამხედრო-სამრეწველო კომპლექსისთვის მუშაობენ, მათ შორის კიროვის ხელოვნური ტყავის კომბინატი და კურგანის სამკერვალო ფაბრიკა.

საბოლოო სიაში თავდაპირველად დაგეგმილზე ერთი ორგანიზაციითა და ერთი პირით ნაკლები აღმოჩნდა. სიიდან ამოიღეს სოლიკამსკის მაგნიუმის ქარხანა და მისი დირექტორი რუსლან დიმუხამედოვი.

"სისტემის" ინფორმაციით, ახალი სანქციების სიაში შესული ყველა ორგანიზაცია რუსეთის თავდაცვისა და სამხედრო-სამრეწველო კომპლექსის საწარმოთა დახურულ რეესტრშია, რომელსაც რუსეთის მრეწველობისა და ვაჭრობის სამინისტრო აწარმოებს. რეესტრის სრული ვერსია 2025 წელს ცენტრმა "დოსიემ" მოიპოვა.

რეესტრში შედიან სახელმწიფო თავდაცვის შეკვეთების მთავარი შემსრულებლები, რუსეთის სამხედრო-სამრეწველო კომპლექსის კონტრაქტორები და მომწოდებლები, ასევე კრიტიკულად მნიშვნელოვან ობიექტებად მიჩნეული ორგანიზაციები.

2025 წლის დასაწყისისთვის რეესტრში, ფილიალების ჩათვლით, 6344 ორგანიზაცია ირიცხებოდა. შესაბამისად, ევროკავშირის ახალ სიაში მრეწველობის სამინისტროს რეესტრში არსებული საწარმოების მხოლოდ მცირე ნაწილი მოხვდა.

რეესტრში ყველაზე დიდი წილი რადიოელექტრონიკის ინდუსტრიის საწარმოებს უკავია — 2 ათასზე მეტ ორგანიზაციას. გარდა ამისა, ჩამონათვალშია საავტომობილო და სარკინიგზო მრეწველობის 619 კომპანია, ქიმიური მრეწველობის 432 და მეტალურგიის 429 საწარმო, ასევე ავიაციის 390 და გემთმშენებლობის 265 ორგანიზაცია.