საპატრიარქოს საზოგადოებასთან ურთიერთობის სამსახურის ხელმძღვანელის, ანდრია ჯაღმაიძის ცნობით, რუსეთში ქართული ტაძრის აღდგენის საკითხზე დიალოგი მხარეებს შორის დაწყებულია და მოიაზრება, რომ რუსეთში ქართველი მეცნიერებიც გაემგზავრებიან.

"დეტალები ჯერ არ გვაქვს, მოსკოვში არ არის ეს ტაძარი, თუმცა რუსეთშია. სხვას ჯერ ვერ გეტყვით, როცა იქნება საჭირო და დავიწყებთ მუშაობას, ვიტყვით და [ჯგუფის წასვლის შესახებ] ინფორმაციას არ დავმალავთ. მე არ ვარ ამ ჯგუფში ჩართული, ჯერ დასაწყისია ამ ყველაფრის.

მნიშვნელოვანია, რომ რეაბილიტაციის პროცესში ჩართული იყოს სამეცნიერო ნაწილი", — განაცხადა ანდრია ჯაღმაიძემ IPN-თან საუბრისას.

რუსეთის ტერიტორიაზე მდებარე ერთ-ერთი ქართული ტაძრის აღდგენის შესახებ ცნობა საქართველოს საპატრიარქოში რუსეთის საპატრიარქოს წარმომადგენლების ვიზიტის შემდეგ გავრცელდა.

2 ოქტომბერს ანდრია ჯაღმაიძემ IPN-თან საუბრისას თქვა, რომ რუსეთი ქართულ ტაძრებს საქართველოს მემკვიდრეობად აღიარებს და ერთ-ერთი მათგანის აღდგენის პროცესში ქართველი მეცნიერებიც ჩაერთვებიან.

"ძალიან დიდი ქართველი მოსახლეობაა რუსეთში, ისინი აღმსარებლები არიან, იქ არის ქართული ტაძრები. რუსეთში არის ქართული ტაძრები, რომელსაც საქართველოს მემკვიდრეობად აღიარებს რუსეთი და ჩვენ დიალოგი გვაქვს ერთ-ერთი ტაძრის აღდგენაზე, რომელზეც მათ თავად მიგვიწვიეს და ჩვენი მეცნიერები იქ იქნებიან ჩართულები რეაბილიტაციაში. ოკუპირებული ტერიტორიები ძირითადი საკითხი დარჩება ისევ სასაუბროდ, რომ იქ საეკლესიო ცხოვრება მოწესრიგდეს. ასე რომ, თემები ბევრია. ყველა საკითხზე იქნება საუბარი, რაც ჩვენს ინტერესებში არის", — განაცხადა ჯაღმაიძემ.