ეუთოს თავმჯდომარე ქვეყნის, შვეიცარიის წარმომადგენელი პარლამენტის თავმჯდომარის, შალვა პაპუაშვილის განცხადებას გამოეხმაურა. საქმე ისაა, რომ პაპუაშვილმა გუშინ, ეუთოში წარდგენილ კვლევას, რომელიც 2024 წლის აქციების დროს დემონსტრანტებზე ქიმიური გამაღიზიანებელი საშუალებების გამოყენების შესაძლო გავლენას ეხება, "აბსურდი და ტყუილი" უწოდა. როგორც პაპუაშვილმა თქვა, რომ კვლევის უკან უცხოეთიდან ფარულად დაფინანსებული არასამთავრობო ორგანიზაციები დგანან და მათი საქმიანობისა და დაფინანსების გაუმჭვირვალობა მიუთითებს, რომ საქართველოში "შავი ფულით" ფინანსდება სხვადასხვა ინიციატივა, მათ შორის ევროპული ორგანიზაციებიდან.

ეუთოს შვეიცარიის წარმომადგენელმა ვარშავაში მიმდინარე კონფერენციაზე პაპუაშვილის განცხადების გამო, შეშფოთება გამოთქვა და ხაზი გაუსვა, რომ "მნიშვნელოვანია ეუთოს ღონისძიებებში უსაფრთხო მონაწილეობა, ყოველგვარი საპასუხო ზომების გარეშე".

"დღეს ვარშავის ადამიანური განზომილების კონფერენციის [Warsaw Human Dimension Conference] მეოთხე დღე იწყება. შვეიცარიის თავმჯდომარეობას სურს, შეახსენოს ყველა მონაწილეს ამ შეხვედრის ქცევის კოდექსი და მოგიწოდებთ, გაეცნოთ მას ღონისძიების ვებგვერდზე. ისეთი პლატფორმის უზრუნველყოფა, სადაც სამოქალაქო საზოგადოების წარმომადგენლებს შეუძლიათ მონაწილეობა და ჩართულობა ეუთოს მონაწილე სახელმწიფოებთან და აღმასრულებელ სტრუქტურებთან ერთად, ეუთოს ერთ-ერთი მთავარი ფასეულობაა. მათ ამის გაკეთება ყოველგვარი უარყოფითი შედეგების გარეშე უნდა შეეძლოთ.

ეს აუცილებელია ეუთოს ინსტრუმენტების ფუნქციონირებისთვის. შეშფოთებული ვართ ქართველი სამოქალაქო საზოგადოების წარმომადგენლების მიმართ ამ კონფერენციაში მათ მონაწილეობასთან დაკავშირებით გამოთქმული კომენტარებით, აგრეთვე, ვარშავის ადამიანური განზომილების კონფერენციის მონაწილე სხვადასხვა უფლებადამცველისგან მიღებული ცნობებით. გვინდა კიდევ ერთხელ ხაზგასმით აღვნიშნოთ, რამდენად მნიშვნელოვანია ეუთოს ღონისძიებებში უსაფრთხო მონაწილეობა, ყოველგვარი საპასუხო ზომების გარეშე," — განაცხადა შვეიცარიის წარმომადგენელმა.

ცნობისთვის, 7 ოქტომბერს ეუთოში 2024 წლის აქციების დროს დემონსტრანტებზე ქიმიური გამაღიზიანებელი საშუალებების გამოყენების შესაძლო გავლენაზე ჩატარებულ კვლევაზე პრეზენტაცია გაიმართა, რომელსაც არასამთავრობო ორგანიზაციების ხელმძღვანელები ბაია პატარაია და თამარ ონიანი ესწრებოდნენ.