ლედიბაგისა და ქეთნუარის ისტორია ეკრანებზე "ლაივ ექშენ" სერიალის სახით ბრუნდება.

ახალ პროექტზე ორი კომპანია ითანამშრომლებს: Miraculous Corp და ოსკარისა და ემის ჯილდოების მფლობელი სტუდია See-Saw Films, რომელიც Slow Horses-სა და Heartstopper-ის შემქმნელია. პროდიუსერების თქმით, ამ გადაწყვეტილების მთავარი მიზანია, შოუ უფრო ფართო აუდიტორიას გააცნოს და ზრდასრული მაყურებელიც მიიზიდოს.

თომას ასტრუკის, ჯერემი ზაგისა და ნათანაელ ბრონის მიერ შექმნილი შოუ, Miraculous: Tales of Ladybug & Cat Noir, საფრანგეთში პირველად 2015 წელს გამოვიდა. ის მოგვითხრობს მარინეტის — შრომისმოყვარე და კეთილი გოგოს ისტორიას, რომელსაც სჯერა, რომ სიყვარულის დამსახურებისთვის სრულყოფილი უნდა იყოს. მეორე მხარეს კი ქარიზმატული და ყველასთვის საყვარელი ადრიენია, რომელსაც დამოუკიდებელი გადაწყვეტილებების მიღების უფლება ცხოვრებაში არასდროს ჰქონია. დღისით მარინეტი და ადრიენი თანაკლასელები არიან, ღამით კი, როგორც ლედიბაგი და ქეთნუარი, პარიზის დასაცავად გვერდიგვერდ იბრძვიან. რა თქმა უნდა, ისინი ერთი და იგივე ადამიანები არიან. უბრალოდ, ეს ჯერ არ იციან.

ფოტო: Pinterest

"Miraculous არის ისტორია, რომელიც გვიყვება, რამხელა განსხვავებაა იმას შორის, თუ ვინ ვართ სინამდვილეში და ვის ვაჩვენებთ საზოგადოებას. ახალი ფორმატი ამის გადმოსაცემად მეტ საშუალებას გვაძლევს. ჩვენი მიზანია, შევქმნათ სიყვარულისა და სუპერგმირების ეპიკური ისტორია," — აღნიშნა მარია ნიკოლსონმა, See-Saw Films-ის აღმასრულებელმა პროდიუსერმა.

Miraculous-ის ანიმაციურმა სერიალმა მთელი მსოფლიოს მასშტაბით პოპულარულობა მალევე მოიპოვა. ანიმაციის YouTube-ს 54 მილიონი გამომწერი ჰყავს, ჯამში 55 მილიარდზე მეტი ნახვა აქვს, თვიური ნახვების რაოდენობა კი საშუალოდ 900 მილიონს აღწევს.