რუსეთის საგარეო საქმეთა სამინისტროს ოფიციალურმა წარმომადგენელმა, მარია ზახაროვამ ბრიფინგზე განაცხადა, რომ რუსეთ-საქართველოს ურთიერთობებში არსებული ვითარება "ყელში გაჩხერილი ძვალივითაა" ბევრი არარეგიონული მოთამაშისთვის, რომლებიც, მისი მტკიცებით, საქართველოს რუსოფობიური ხასიათის სახიფათო ავანტიურაში ჩათრევას ცდილობენ. მისივე თქმით, რუსეთი მზადაა ეკონომიკური ურთიერთობები კიდევ უფრო განავითაროს საქართველოსთან და ხალხებს შორის მეგობრობა განამტკიცონ.

"საქართველოსთან მჭიდრო კავშირები გვაკავშირებს. ჩვენ საერთო ისტორია, რელიგია და ტრადიციები გვაქვს. გვაერთიანებს ნათესაური კავშირები და ურთიერთსასარგებლო თანამშრომლობა.

მართლაც, ბოლო წლებში ვაჭრობისა და ტურიზმის სფეროში მნიშვნელოვანი პროგრესი აშკარაა. საქართველოში ყოველი მეოთხე ტურისტი რუსეთიდანაა, ხოლო ჩვენი დიდი სამომხმარებლო ბაზარი საქართველოს ძირითადი საექსპორტო საქონლისთვის უმთავრეს ბაზარს წარმოადგენს. ესეც უმნიშვნელოვანესი ფაქტორია. მზად ვართ, ეკონომიკური ურთიერთობები კიდევ უფრო განვავითაროთ და ჩვენს ხალხებს შორის მეგობრობა განვამტკიცოთ.

შეუძლებელია, ვერ შევამჩნიოთ, რომ რუსეთ-საქართველოს ურთიერთობებში არსებული ვითარება ყელში გაჩხერილი ძვალივითაა ბევრი არარეგიონული მოთამაშისთვის, რომლებიც ცდილობენ, საქართველო რუსოფობიური ხასიათის სახიფათო ავანტიურებში ჩაითრიონ. ოფიციალურ თბილისს არაერთხელ, მკაფიოდ და გასაგებად განუცხადებია, რომ საკუთარი თავისთვის ზიანის მიყენება ქართველი ხალხის გეგმებში არ შედის. ეს ნიშნავს მოქმედებას საკუთარი ეროვნული ინტერესების საწინააღმდეგოდ, საკუთარი განვითარების მიზნებისა და ამოცანების წინააღმდეგ.

გაგებით ვეკიდებით რესპუბლიკის მცდელობებს, წინ აღუდგეს ამ პროცესებს და ბარიერი შექმნას გარედან მომდინარე ამ დესტრუქციული გავლენებისთვის, ამასთან, უცხოელ პარტნიორებთან თანასწორობისა და ურთიერთპატივისცემის საფუძველზე იმოქმედოს", — განაცხადა ზახაროვამ.