რუსეთის ქალაქ კალუგაში მდებარე ტექნოლოგიური კომპანია Yandex-ის მონაცემთა ცენტრის ინფრასტრუქტურის ნაწილი უკრაინის მიერ დრონებით განხორციელებული თავდასხმის შედეგად დაზიანდა.

უპილოტო საფრენი აპარატების თავდასხმის შედეგად მონაცემთა ცენტრის რამდენიმე მოდული სრულად გამოვიდა მწყობრიდან, რამაც შესაძლოა Yandex-ის ზოგიერთი სერვისის მუშაობის შეფერხება გამოიწვიოს. კომპანიის ცნობით, შემთხვევის ადგილზე საგანგებო სიტუაციების სამსახურები და Yandex-ის სპეციალისტები მუშაობენ, დაღუპულთა შესახებ ინფორმაცია არ ვრცელდება. ამჟამად კომპანია მიყენებული ზარალის სრულ მასშტაბს აფასებს.

პარალელურად, დღეს დილით კალუგის ოლქის გუბერნატორმა, ვლადისლავ შაპშამ განაცხადა, რომ რეგიონის თავზე 26 დრონი ჩამოაგდეს. აღსანიშნავია, რომ ეს პირველი მსგავსი ინციდენტი არ არის — წინა დღეს Yandex-მა გაავრცელა ინფორმაცია, რომ დრონის თავდასხმამ ხანძარი გამოიწვია ქალაქ სასოვოში მდებარე მონაცემთა ცენტრშიც.